Túrkistan oblysynda jedel járdem qyzmetkerleri nege jol jóndep júr
TÚRKІSTAN. KAZINFORM — Túrkistan oblysynyń Qazyǵurt aýdanynda jedel járdem qyzmetkerleriniń jol jóndep jatqan sáti túsirilgen vıdeo áleýmettik jelide qyzý talqyǵa tústi.
Vıdeo avtorynyń aıtýynsha, kadrlarda kórsetilgen jol aýrýhanaǵa aparatyn negizgi baǵyttardyń biri. Onyń sózinshe, joldyń oı-shuńqyr bolýyna baılanysty órt sóndirý jáne jedel járdem kólikteriniń qatynaýy qıyndaǵan. Osyǵan baılanysty medıtsına qyzmetkerleri joldy ózderi jóndeýge kirisken.
Beınejazbada jedel járdem qyzmetkerleriniń kúrek ustap, joldaǵy shuńqyrlardy jóndep júrgeni kórinedi. Jeli qoldanýshylary medıtsına mamandarynyń jol jóndeýmen aınalysqanyna narazylyq bildirdi.
Osy jaǵdaıǵa baılanysty Qazyǵurt aýdanynyń ákimdigi túsinik berdi.
Ákimdik málimetinshe, qazirgi ýaqytta aýdan boıynsha jergilikti mańyzy bar avtomobıl joldary men eldimekenderdiń ishki kóshelerindegi shuńqyrlardy jamaý, sondaı-aq jol jamylǵysyndaǵy aqaýlardy qalpyna keltirý jumystary júrgizilip jatyr.
— «Jaryq-Jol jáne saıabaqtary» MKK-niń tapsyrysy negizinde atalǵan jumystardy merdiger «Titan Build Company» JShS atqaryp jatyr. Anyqtalǵan aqaýlar kezeń-kezeńimen qalpyna keltiriledi, — delingen aýdan ákimdiginiń aqparatynda.
Sondaı-aq ákimdik jol jóndeý jumystaryn qyrkúıek aıynyń sońyna deıin aıaqtaý josparlanǵanyn habarlady.
Buǵan deıin Túrkistan oblysynda jóndelgen jol eki aıǵa jetpeı oıyla bastaǵanyn jazǵan edik.
