Túrkistan oblysynda jedel respıratorly vırýsty ınfektsııa juqtyrǵandar kóp
TÚRKІSTAN. KAZINFORM – Jyl basynan beri Túrkistan oblysynda 3 adamnan «COVID-19» ınfektsııasy anyqtaldy. Bul týraly Túrkistan oblysynyń SEBD basshysynyń orynbasary Bahtyoraz Elemesov málimdedi.
Qańtar aıynda óńirde 34 481 adam jedel respıratorly vırýsty ınfektsııa juqtyrǵan. Bul kórsetkishti ótken jyldyń sáıkes kezeńimen salystyrsaq 1,6 esege óskenin kóremiz. Atalǵan ınfektsııa ásirese 14 jasqa deıingi balalar arasynda 1,7 esege artqan. Al, tumaý juqtyrýshylardyń sany edáýir tómendegen. Sondaı-aq, jyl basynan beri Túrkistan oblysynda 3 adamnan «COVID-19» vırýsy anyqtalyp otyr. Naýqastanýshylardyń barlyǵy koronavırýsqa qarsy ekpe almaǵan eresekter.
«Respýblıka boıynsha búginderi qyzylsha, kókjótel aýrýlary jáne basqada vaktsınamen basqarylatyn keıbir ınfektsııalardan turaqsyz epıdemıologııalyq jaǵdaı qalyptasyp otyr. Túrkistan oblysy boıynsha qyzylshadan epıdemıologııalyq ahýaldy turaqsyz dep sıpattaýǵa bolady. Alys jáne jaqyn shet elderdegi epıdemıologııalyq jaǵdaılardy eskersek, JRVI/tumaý, koronavırýstyq ınfektsııa boıynsha da qaýiptilik seıilgen joq» - dedi Bahtyoraz Elemesov.
Óńirge jergilikti bıýdjet qarjysy esebinen tumaýǵa qarsy «Grıppol+» vaktsınasynyń 248 691 dozasy jetkizilgen. Al, tumaýǵa qarsy egilgen turǵyndar sany 12,2 paıyzdy qurap otyr.
«Halyq kóp jınalatyn jerlerde, kóliktiń barlyq túrlerinde medıtsınalyq nemese matadan tigilgen maskalardy paıdalanýdy usynamyn. Sonymen qatar, medıtsınalyq uıymdardaǵy personaldar men kelýshiler medıtsınalyq maskalardy paıdalanyp, antıseptıkterdiń bolýyn qamtamasyz etýi kerek» - dedi Bahtyoraz Elemesov.
