Túrkistan oblysynda jaıylymdaǵy mal jyrtqyshtarǵa jem bolyp jatyr
TÚRKІSTAN. KAZINFORM — Túrkistan oblysynyń Báıdibek aýdanynda qasqyrlar jaıylymdaǵy malǵa aýyz salyp, qyryp jatyr. Jyrtqyshtardan ásirese aýdandaǵy Maıbulaq, Jańatalap, Aqtas, Aǵybet sııaqty birneshe aýyl turǵyndary zardap shegip otyr.
Jergilikti turǵyndardyń aıtýynsha, ıt-qustardyń malǵa shabýy tamyz aıynan beri jıilegen. Olar qansha kúzetse de, qasqyrdyń betin qaıtara almaı otyrǵanyn aıtady. Usaq maldy aıtpaǵanda sıyr men jylqysynan aıyrylǵan sharýalar kóp.
Máselen, Aǵybet aýyldyq okrýginde qora salyp, jylqy baǵyp otyrǵan sharýa Átirhan Kemelbekovtyń 10 shaqty malyn qasqyr jep ketken.
Al taǵy bir sharýa Aıan Myńbaıdyń 12 bas jylqysy túz taǵysyna jem bolǵan. Budan bólek, aýyl turǵyndarynyń birazynda jekeleı shyǵyndar az emes.
Qasqyrlardyń malǵa shabý oqıǵalary Boqtysaı, Qalaýbaı asýy, Qusuıa, Janamasaı, Tuıyqbulaq aımaqtarynda da tirkelip otyr.
Aýyl turǵyndarynyń qasqyrlardy óz betinshe atýǵa ruqsaty joq. Sebebi, aýyldaǵy myltyqtar jappaı jınap alynǵan.
Báıdibek aýdany ákimdiginiń málimetinshe, Aǵybet aýyl okrýgi ákimi apparaty tarapynan Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasy basshylyǵyna qasqyr aýlaýshylar tobyn jiberý jóninde qyrkúıek jáne qazan aılarynda eki ret resmı hat joldanǵan.
— Birinshi hat joldanǵannan keıin atalǵan mekeme tarapynan ańshylar toby bir kúnge keldi, alaıda qasqyr jolyqpaǵan. Ekinshi usynys hat joldaǵan ýaqytta atalǵan mekeme tarapynan qarashanyń 1-3 kúnderi qasqyr sanyn retteýge kómekke shaqyrtylǵanyn habarlady, biraq belgisiz sebeptermen kelmedi. Endi aldaǵy 10 kúnniń kóleminde atalǵan aýyldarǵa bir top ańshylar keledi dep josparlanyp otyr, olarǵa qasqyrlardy ustaý, atý boıynsha aýdan tarapynan tıisti kómek beriledi, — delingen aýdan ákiminiń baspasóz hatshysy Jeńis Dúmshebaevtyń bizge usynǵan jaýabynda.
Budan buryn Túrkistan oblysynda qýańshylyqtan egistik kúıip, mal azyǵy qymbattaǵanyn jazǵan edik.