Túrkistan oblysynda «Jastar praktıkasy» baǵdarlamasymen 4 514 jas jumysqa joldandy
TÚRKІSTAN. KAZINFORM - «Jastar praktıkasy» baǵdarlamasy kolledj jáne JOO-nyń túlekteri úshin oqyǵan mamandyǵy boıynsha alǵashqy jumys ótilin alý, ıaǵnı tájirıbe jınaý maqsatynda uıymdastyrylady. Bul baǵdarlama tájirıbesi joq jas mamandar úshin mol múmkindik beredi.
Bıyl Túrkistan óńirinde «Jastar praktıkasy» jobasyna 4 514 adam joldanǵan. Atalǵan joba boıynsha jalaqy mólsheri 30 AEK-ti (110 760 tg) quraıdy. Al, qarjylandyrý memlekettik bıýdjet esebinen júrgiziledi. Sondaı-aq jumys berýshi bos jumys orny paıda bolǵan jaǵdaıda «Jastar praktıkasyna» qatysýshynyń kelisimimen ony turaqty jumysqa ala alady.
Jetisaı aýdanynyń turǵyny Janar Saǵyntaeva Muhtar Áýezov atyndaǵy Ońtústik Qazaqstan tehnıkalyq ýnıversıtetine oqýǵa túsip, qolyna dıplom alǵan bolatyn. Ol eńbek jolyn «Jastar praktıkasy» baǵdarlamasy aıasynda ózi bilim alǵan mektepten bastady. Keıinnen birneshe qyzmetke aýysty. Al, qazirgi tańda Janar Qaıratqyzy Jetisaı aýdandyq «Tilderdi damytý ortalyǵynda» basshynyń orynbasary qyzmetinde jemisti eńbek etýde.
Al, Altynaı Jumadilqyzy búgingi tańda Tólebı aýdany boıynsha kirister basqarmasynda «Jastar praktıkasy» baǵdarlamasymen jumysqa joldama alǵan bolatyn. Ujymdastarynan bilmeginin úırenip, tájirıbıe jınap jatqanyna rıza bolyp, jas maman «Mansap» ortalyǵyna alǵys bildirdi.
Ásel Qaıratqyzy Báıdibek aýdandyq «Mansap» ortalyǵyna júginip, «Zeıin» mektebine jastar praktıkasy baǵdarlamasy sheńberinde joldanǵan.
«Men «Jastar tájirıbesi» jobasy boıynsha jumys istep jatqanyma qýanyshtymyn. Praktıkadan keıin osy mektepke turaqty jumysqa turýdy josparlap otyrmyn», - deıdi Ásel.
«Jastar praktıkasy» baǵdarlamasynyń talaptaryna toqtalsaq, «Jastar praktıkasyna» qatysýshynyń jasy 35-ten aspaýy tıis. Sondaı-aq jumyssyz retinde tirkelýi kerek. Sonymen qatar tehnıkalyq jáne kásiptik, orta bilimnen keıingi, joǵary jáne (nemese) JOO keıingi baǵdarlamalar boıynsha oqý bitirgenine 5 jyl tolmaýy, meńgergen kásip (mamandyq) boıynsha jumys tájirıbesi bolmaǵany jón.
Aıta keteıik, bıyl oblys boıynsha «Óńirlik jumyspen qamtý kartasy» aıasynda 118,9 myń jumys oryndaryn ashý josparlanyp, 47,6 myń jastardy jumyspen qamtý kózdelýde. Sondaı-aq 2024 jyldyń 1 qyrkúıegindegi jaǵdaımen naqty 78,8 myń jumys oryndary ashylyp, onyń ishinde 40,7 myń jas jumyspen qamtyldy. Onyń ishinde «Eńbek naryǵyn damytýdyń 2024-2029 jyldarǵa arnalǵan tujyrymdamasy» aıasynda naqty 27 614 jas jumyspen qamtý sharalaryna jiberilip, jalpy 10 829 adam turaqty, al qalǵan 11 752 adam ýaqytsha jumys oryndaryna joldandy.
