Túrkistan oblysynda jasóspirimge azǵyndyq áreket jasaǵan muǵalim sottaldy

TÚRKІSTAN. KAZINFORM – Dene shynyqtyrý pániniń muǵalimi 12 jyl 6 aı merzimge bas bostandyǵynan aıyryldy.

Túrkistan oblysynyń qylmystyq ister jónindegi mamandandyrylǵan aýdanaralyq sotynda Qazaqstan Respýblıkasy Qylmystyq kodeksiniń 124-babynyń 2-bóligimen aıyptalǵan er adamǵa qatysty qylmystyq is qaraldy.

Іs materıaldaryna sáıkes, sottalýshy Qazyǵurt aýdanyndaǵy jalpy bilim berý mektebinde dene shynyqtyrý pániniń muǵalimi bolyp qyzmet atqarǵan. Balalardy tárbıeleý jónindegi zańmen júktelgen mindetterine qaramastan, ol 2025 jyldyń 20 qańtarynda óz avtokóliginde 2010 jyly týǵan jasóspirimge qatysty azǵyndyq áreketter jasaǵan.

Sot otyrysynda taraptardyń ustanymy tyńdaldy. Memlekettik aıyptaýshy sottalýshyny kináli dep tanyp, ony belgili bir qyzmet túrimen aınalysý quqyǵynan ómir boıyna aıyra otyryp, 12 jyl merzimge bas bostandyǵynan aıyrý jazasyn taǵaıyndaýdy surady.

Óz kezeginde sottalýshy taǵylǵan aıypty moıyndamaı, áreketin jeńil bapqa aýystyrýdy ótindi.

- Sot úkimimen er adam kináli dep tanylyp, ol belgili bir qyzmetpen aınalysý quqyǵynan ómir boıyna aıyryla otyryp, 12 jyl 6 aı merzimge bas bostandyǵynan aıyryldy. Úkim zańdy kúshine engen joq, - delingen Túrkistan oblystyq sotynyń baspasóz qyzmeti taratqan aqparatta.

Aıta keteıik, budan buryn Túrkistan oblysynda belgisiz adamdar áskerı nysanǵa basyp kirmek bolǵanyn jazǵan bolatynbyz.