Túrkistan oblysynda jarty mıllıonǵa jýyq adam jer kezeginde tur

TÚRKІSTAN. KAZINFORM — Sońǵy úsh jylda oblys aýmaǵynda 6074 jer ýchaskesi azamattarǵa berilgen. 

Túrkistan oblysy — elimizdegi halyq eń tyǵyz ornalasqan óńir ǵana emes, sonymen qatar jeke turǵyn úı qurylysyna jer telimin alý boıynsha da kóshbasshy aımaq. Búginde oblys boıynsha jer kezeginde 497 200 adam tirkelgen. Bul — Qazaqstandaǵy eń joǵary kórsetkishterdiń biri.

Biryńǵaı memlekettik jyljymaıtyn múlik kadastry derekterine súıensek, kezek basynda Túrkistan qalasynyń turǵyndary tur — 88 532 adam. Odan keıingi orynda:

— Saıram aýdany — 69 073,

— Tólebı aýdany — 54 944,

— Saryaǵash aýdany — 50 451,

— Ordabasy aýdany — 32 942,

— Kentaý qalasy — 30 461,

— Saýran aýdany — 29 272,

— Túlkibas aýdany — 27 953,

— Jetisaı aýdany — 25 824,

— Qazyǵurt aýdany — 22 842,

— Keles aýdany — 17 851,

— Maqtaaral aýdany — 13 505,

— Shardara aýdany — 12 337,

— Báıdibek aýdany — 7149,

— Arys qalasy — 6112,

— Otyrar aýdany — 4032 adam.

Al eń az kórsetkish Sozaq aýdanynda — bar bolǵany 3 920 adam tirkelgen.

Jer kodeksiniń talaptaryna sáıkes, jeke turǵyn úı qurylysyna jer telimderi tek sýmen jáne elektrmen jabdyqtaý jelileri júrgizilgen aýmaqtarda ǵana beriledi. Osyǵan oraı, aýdan jáne qala ákimdikteri ınfraqurylym tartý jumystaryn kezeń-kezeńimen atqaryp keledi. Sońǵy úsh jylda oblys boıynsha 6 074 jer ýchaskesi azamattarǵa berilgen.

— 2022 jyldyń birinshi toqsanynan bastap Aýyl sharýashylyǵy mınıstrligi jer kezegin esepke alýdyń elektrondyq aqparattyq júıesin iske qosty. Endi kezekte turǵan ár azamat óziniń retin jáne kezek jyljýyn onlaın túrde, Biryńǵaı memlekettik jyljymaıtyn múlik kadastry aqparattyq júıesi arqyly qadaǵalaı alady — delingen Túrkistan oblysynyń jer qatynastary basqarmasy usynǵan aqparatta.

Aıta keteıik, budan buryn Shyǵys Qazaqstanda jer kezeginde 45 myńǵa jýyq adam turǵandyǵyn jazǵan bolatynbyz.