Túrkistan oblysynda jarysqa bara jatqan 3 jasóspirim jol apatynan kóz jumdy
TÚRKІSTAN. KAZINFORM – Qaıǵyly oqıǵa 22 sáýir kúni Arys-Shardara avtojolynda bolǵan.
Polıtsııanyń habarlaýynsha, «Chevrolet Cobalt» jáne «KamAZ» kólikteriniń qatysýymen jol apaty tirkeldi.
– Apat saldarynan jeńil kóliktiń úsh jolaýshysy oqıǵa ornynda kóz jumdy. «Chevrolet Cobalt» júrgizýshisi jáne taǵy bir jolaýshy medıtsınalyq mekemege jetkizildi. Júk kóliginiń júrgizýshisi ýaqytsha ustaý ızolıatoryna qamaldy, - delingen oblystyq polıtsııa departamenti taratqan aqparatta.
Aldyn ala málimetterge sáıkes, kólik basqarǵan jattyqtyrýshymen birge kámeletke tolmaǵan sportshy jasóspirimder Túrkistan qalasyna jarysqa bara jatqan.
Alaıda kámeletke tolmaǵandardy tasymaldaý boıynsha ýákiletti memlekettik organdarǵa, onyń ishinde polıtsııaǵa habarlama berilmegen.
– Qazirgi ýaqytta jol-kólik oqıǵasyna baılanysty barlyq mán-jaılardy anyqtaýǵa baǵyttalǵan qajetti is-sharalar júrgizilip jatyr. Sondaı-aq balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý faktisi boıynsha sotqa deıingi tergeý bastaldy, - dep málimdedi vedomstvo.
Polıtsııa ókilderi tergeý nátıjesi boıynsha qoldanystaǵy zańnamaǵa sáıkes sheshim qabyldanatynyn atap ótti. Sonymen qatar, tergeý múddesine baılanysty ózge aqparattar jarııa etilmeıtini naqtylandy.
Budan buryn Túrkistan oblysynda júrgizýshi eki balany qaǵyp ketkenin jazǵan edik.
