Túrkistan oblysynda jappaı senbilik ótip, aǵash kóshetteri otyrǵyzyldy
TÚRKІSTAN. KAZINFORM – «Naýryz – salt-dástúrdiń jańǵyrýy» is-shara josparyna sáıkes óńirde jappaı senbilik ótti.
«Naýryz – tazalyq aınasy» jobasy aıasynda ótken tazalyq jumystaryna turǵyndar men memlekettik jáne kvazımemlekettik mekeme qyzmetkerleri qatysty.
Máselen, Jetisaı aýdanyndaǵy senbilikke 16 tehnıka men 1 200-ge jýyq turǵyn jumyldyryldy. Nátıjesinde 70 tonnaǵa jýyq turmystyq qatty qaldyqtar shyǵaryldy. Saıabaqtar men alleıalarǵa, kóshe boılaryna, áleýmettik nysandardyń aýmaǵyna demeýshiler esebinen 10 000 jýyq túrli aǵash kóshetteri otyrǵyzyldy.
Al, arystyqtar kóshelerdi tazalap, shóp shaýyp, aǵashtardy syrlap shyqty. Senbilikke saýrandyqtarda belsendi qatysty. Aýdan aýmaǵyna 20 myńǵa jýyq kóshet otyrǵyzyldy. Aýdan ákimi Maqsat Tańǵatarov bas bolyp, tazalyq jumystaryn júrgizdi.
Kentaýlyqtar qala aýmaǵyna 500 túp shyrsha men qaratal otyrǵyzdy. Qalanyń kórkeıýine bastaıtyn berekeli bastamaǵa Kentaý qalasynyń ákimi Jandos Tasov bastaǵan qalanyń zııaly qaýym ókilderi de qatysty. Qala kóshelerimen aryq-atyzdar qoqystardan tazartylyp, aǵashtar ákteldi. Alleıalardaǵy oryndyqtar men qoqys jáshikteri boıaldy.
Merekelik sharaǵa 600-ge jýyq qala turǵyny atsalysyp, 11 tehnıka jumyldyryldy. Jalpy 80 tonnadan astam qoqys polıgonǵa shyǵaryldy.
Senbilik oblys aýmaǵyndaǵy ózge de aýdan, qalalarda jalǵasty.
