Túrkistan oblysynda janýarlardy jaıý qaǵıdasyn buzǵan 3 myńnan astam turǵyn jaýapqa taratyldy
TÚRKІSTAN. KAZINFORM – Túrkistan oblysynda Polıtsııa departamenti qyzmetkerleriniń bastamasymen mal urlyǵy qylmysynyń aldyn alý baǵytynda arnaıy jumysshy toby quryldy.
Onyń quramyna jergilikti atqarýshy organdardyń ókilderi jáne veterınarııalyq baqylaý men qadaǵalaý, úkimettik emes uıymdardyń qyzmetkerleri enip otyr.
Sala mamandarynyń birlesip júrgizgen reıdtik jumystarynyń qorytyndysynda aýyl sharýashylyǵy janýarlaryn jaıý qaǵıdalaryn buzǵan 3 346 turǵyn anyqtalyp, olarǵa shara qoldanyldy. Odan bólek, mal urlyǵy qylmystarynyń aldyn alý maqsatynda Qazaqstan Respýblıkasynyń veterınarııa salasyndaǵy zańnamasyn buzý babymen 580 turǵynǵa qatysty hattama toltyryldy.
«Jaıylymdy jerlerde qaraýsyz júrgen úı janýarlaryn azaıtý maqsatynda «jergilikti atqarýshy organ – halyq – baqtashylar» arasynda úsh jaqty kelisimshart jobasy jasalǵan bolatyn. Búginde bul baǵytta 4 529 kelisimshart túzildi. Óz kezeginde Túrkistan oblysynyń polıtseıleri mal jaıý qaǵıdalaryn saqtaýdy jáne tórt túlikti qaraýsyz jibermeý kerektigin eskertedi. Sondaı-aq, baqtashy jaldaýǵa keńes beredi»-delingen Túrkistan oblysy polıtsııa departamentiniń baspasóz qyzmeti taratqan aqparatta.
