Túrkistan oblysynda jańadan 72 tik drenajdy uńǵyma qoldanysqa berildi

ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Túrkistan oblysyna sapary aıasynda «Irrıgatsııa jáne drenaj júıelerin jetildirý» jobasynyń nátıjelerimen tanysty.

Mınıstrlik málimetinshe, Saýran aýdanynda 72 tik drenajdy uńǵyma qazylyp, qoldanysqa berildi. Ár uńǵyma 45 metr tereńdikten sekýndyna 60 lıtr jerasty sýyn beredi. Bul egis alqabyna qosymsha sý jiberý úshin qajet.

Ordabasy aýdanynda 44 tik drenajdy uńǵymanyń 17-si jóndeldi. Onyń ishinde 10 uńǵyma qoldanysqa berildi. Bul uńǵymalar sor shaıý jumystary úshin de óte mańyzdy. Nátıjesinde topyraqtyń qunarlyǵy artyp, ár gektardyń ónimdiligi ulǵaıady.

Óńirge sapary barysynda mınıstr Bógen sý qoımasyna da bardy. Qoımanyń jalpy syıymdylyǵy – 370 mln tekshe metr. Nysan 67 myń gektar egis alqabyn sýmen qamtyp otyr. Búginde sharýalarǵa sekýndyna 50 tekshe metr sý jiberilip jatyr.

Osyǵan deıin sý qoımasyna kópfaktorly zertteý júrgizildi. Sonyń nátıjesi boıynsha nysanǵa kúrdeli jóndeý jumystaryn júrgizý josparlanyp otyr.

- Memleket basshysynyń tapsyrmasy boıynsha biz alǵash ret Astana sý qoımasynda aýqymdy tazalaý jumystaryn bastadyq. Kelesi kezekte Shardara sý qoımasynyń túbin tazalaý úshin jersnarıadtar satyp alýdy josparlap otyrmyz. Sol sekildi Bógen qoımasyn da tazartý máselesin pysyqtaý kerek. Bul qoımaǵa jınalatyn sý kólemin arttyrýǵa múmkindik beredi, - dedi Sý resýrstary jáne ırrıgatsııa mınıstri Nurjan Nurjigitov.

Aıta keteıik, Túrkistan oblysynda 76 shaqyrymnan astam kanal betondaldy.