Túrkistan oblysynda Jańa jyl túni polıtsııaǵa 400-den asa qońyraý tústi
TÚRKІSTAN. KAZINFORM — Jańa jyl merekesi kezinde Túrkistan oblysynyń polıtseıleri táýlik boıy kúsheıtilgen rejımde qyzmet atqardy.
Qoǵamdyq tártipti qamtamasyz etý maqsatynda patrýldik narıadtardyń sany artyp, qyzmet kórsetý marshrýttary naqtylandy. Azamattar kóp jınalatyn oryndar men oıyn-saýyq ortalyqtary qatań baqylaýǵa alyndy.
— Polıtsııa qyzmetkerleriniń jedel ári úılesimdi jumysynyń nátıjesinde mereke tynysh ótti. Jańa jyl túni 102 jedel jelisine barlyǵy 424 habarlama tústi. Olardyń basym bóligi jol qozǵalysy erejeleri men túngi tynyshtyqty buzý, qoǵamdyq oryndarda masań kúıde júrý jáne ózge de quqyq buzýshylyqtarǵa qatysty boldy. Barlyq habarlamalarǵa polıtsııa tarapynan der kezinde tıisti sharalar qabyldandy, — dep habarlady oblystyq Polıtsııa departamenti.
Oblys turǵyndarynyń qaýipsizdigin qatań qadaǵalaý jańa jyldyq demalys kúnderi de jalǵasady.
Budan buryn Almatyda Jańa jyl qarsańynda polıtsııa jasaqtarynyń sany artqanyn jazǵan edik.