Túrkistan oblysynda jańa týǵan sábıin ájethanaǵa tastap óltirgen áıel sottaldy
TÚRKІSTAN. KAZINFORM — Túrkistan oblysynyń Saıram aýdanynda jańa týǵan sábıin ájethana shuńqyryna tastap, onyń ólimine sebepker bolǵan áıelge sot úkimi shyqty.
Sot málimetinshe, aıyptalýshy 2025 jyldyń sáýirinde belgisiz er adammen erikti túrde jynystyq qatynasqa túsip, júkti bolǵan. Alaıda ol júktiligin týystarynan jasyryp, medıtsınalyq esepke turmaǵan jáne tıisti tekserýlerden ótpegen.
2025 jyldyń jeltoqsanynda ol Saıram aýdanyndaǵy úıinde tolǵaǵy kelip, ájethanada toǵyz aılyq jetilgen balany dúnıege ákelgen. Áıel náresteni ájethana shuńqyryna tastap, onyń ómirin saqtap qalýǵa eshqandaı áreket jasamaǵan.
Budan keıin áıel náresteniń kórinip qalmaýy úshin aýlasyndaǵy kúrekpen tas pen topyraq aralas qumdy alyp, shuńqyrdaǵy sábıdiń ústine tastaǵan. Osylaısha ol jańa týǵan balasynyń ólimine sebepker bolǵan.
Sotta áıel ózine taǵylǵan aıypty tolyq moıyndady. Prokýror oǵan 2 jyl merzimge bas bostandyǵyn shekteý jazasyn taǵaıyndaýdy surady.
— Sot úkimimen D. Qylmystyq kodekstiń 100-babymen kináli dep tanylyp, oǵan 2 jyl merzimge bas bostandyǵyn shekteý jazasy taǵaıyndaldy, — delingen oblystyq sottyń habarlamasynda.
Úkim 2026 jylǵy 4 maýsymda zańdy kúshine endi.
Buǵan deıin Túrkistan oblysynda 15 jastaǵy qyzdy zorlaǵan zeınetker sottalǵanyn jazǵan edik.
