Túrkistan oblysynda jańa oqý jyly qarsańynda 10 mektep ashyldy
TÚRKІSTAN. KAZINFORM — «Keleshek mektepteri» jobasy aıasynda oblysta jalpy sany 23 myń balaǵa arnalǵan 29 mekteptiń qurylysy júrgizilip jatyr, dep habarlaıdy oblys ákiminiń baspasóz qyzmeti.
Jańa oqý jylynyń qarsańynda Túrkistan oblysynda Memleket basshysy Qasym-Jomart Toqaevtyń bastamasymen júzege asyrylyp jatqan «Keleshek mektepteri» ulttyq jobasy aıasynda 8 jańa mektep pen 2 jalpy orta bilim oshaǵy ashyldy.
Atap aıtqanda, Tólebı aýdanynyń Dostyq aýylynda 900 oryndyq, Saıram aýdanynyń Aqsý aýylynda 600 oryndyq jańa mektepter paıdalanýǵa berildi.
Budan bólek, Shardara, Saýran, Keles, Saryaǵash, Ordabasy, Maqtaaral aýdandary men Arys qalasynda da 300-600 oryndyq jańa oqý oshaqtary paıdalanýǵa berildi. Bul — óńirdegi bilim ınfraqurylymyn damytýǵa baǵyttalǵan júıeli jumystyń naqty kórinisi. Jobanyń túpki maqsaty — bilim berý ınfraqurylymyn jańǵyrta otyryp, árbir balaǵa sapaly bilimge qol jetkizý múmkindigin jasaý.
Saıram aýdany, Aqsý aýylyndaǵy jańa mekteptiń ashylý rásimine qatysqan Túrkistan oblysynyń ákimi Nuralhan Kósherov ustazdar men oqýshylardy Bilim kúnimen quttyqtap, bul bastamanyń mańyzdylyǵyna erekshe toqtaldy.
– Memleket basshysynyń bastamasymen qolǵa alynǵan «Keleshek mektepteri» jobasy
— jaı ǵana jańa ǵımarattar salý emes, sapaly bilim berý júıesin qalyptastyrýǵa baǵyttalǵan keshendi reforma. Bıylǵy bizdiń óńirde osy jobamen 8 jańa mektep paıdalanýǵa berildi. Bul — bolashaqqa salynǵan kópir. Muǵalimder men oqýshylardyń zamanaýı, qolaıly ortada eńbek etip, bilim alýy — elimizdiń ıntellektýaldy áleýetin arttyratyn basty qural. Sondyqtan bul baǵyttaǵy jumystardy júıeli túrde jalǵastyramyz, — dedi Nuralhan Kósherov.
Jańa mektep zaman talabyna saı tolyq jabdyqtalǵan. Keń kólemdi májilis zaly, zamanaýı sheberhanalar, kitaphana, ashana, sport zaly, horeografııa zaly, medıtsınalyq kabınetter jáne beınebaqylaý júıeleri qarastyrylǵan. Bul mektepterde tek bilim berýdiń sapasy ǵana emes, sonymen qatar oqýshynyń shyǵarmashylyq áleýetin ashýǵa, tsıfrlyq saýattylyǵyn arttyrýǵa, qaýipsiz jáne yńǵaıly orta qalyptastyrýǵa basa mán beriledi.
«Keleshek mektepteri» jobasy aıasynda Túrkistan oblysynda jalpy sany 23 myń balaǵa arnalǵan 29 mekteptiń qurylysy júrgizilýde. Eki aýysymmen 46 myń bala bilim alady.
Onyń 13-i ótken oqý jylynda paıdalanýǵa berilse, bıylǵy jańa oqý jylynda taǵy 16 mektep oqýshylarǵa esik ashpaq.
Sondaı-aq Memleket basshysynyń «Mektepterdi jańǵyrtý» (renovatsııa) tapsyrmasyna oraı, úsh jylda 115 mektep jańartýdan ótetin bolady. Bıyl oblysta 100 mektep jóndeýden ótti.
Jańa formattaǵy bul oqý oryndary bilim berýdiń jańa mazmunyn iske asyrýda, pedagogtardyń kásibı ósýine múmkindik týǵyzyp, keleshek urpaqqa sapaly bilim men sanaly tárbıe berýge negiz bolmaq.