Túrkistan oblysynda jańa eki sý qoımasynyń qurylysy aıaqtalýǵa jaqyn
ASTANA. KAZINFORM – Túrkistan oblysynda «Báıdibek-ata» jáne «Qaraqýys» sý qoımalarynyń qurylysy jalǵasyp jatyr.
Kólemi 68 mln tekshe metr bolatyn «Báıdibek-ata» sý qoımasy Túrkistan oblysynyń Báıdibek aýdanynda, Balabógen men Úlken Bógen ózenderiniń qosylatyn jerinde, jalpy aýmaǵy 860 gektar bolatyn jerde salynyp jatyr. Sý qoımasy bógetiniń uzyndyǵy – 1,75 shaqyrym, bıiktigi – 26 metr.
Bul nysan tasqyn sýdy jınap, vegetatsııa kezeńinde qosymsha sý kólemin Bógen sý qoımasyna tıimdi baǵyttaýǵa múmkindik beredi. Qazirgi tańda joba boıynsha qurylys jumystary 75 paıyzǵa oryndalǵan.
«Báıdibek-ata» sý qoımasynan Bógen sý qoımasyna sý berý úshin «Sarqyrama» kanaly salynyp jatyr. Uzyndyǵy 21,7 shaqyrym bolatyn bul kanal sekýndyna 12 tekshe metrge deıin sý ótkize alady jáne 2,5 myń gektar sýarmaly alqapty sýarmaly sýmen qamtamasyz etedi. Búginde uzyndyǵy shamamen 21 shaqyrym bolatyn ýchaskede jumystar tolyq aıaqtaldy.
Al kólemi 1,2 mln tekshe metrdi quraıtyn «Qaraqýys» sý qoımasy Túrkistan oblysynyń Tólebı aýdanynda salynyp jatyr. Qazirgi ýaqytta qurylys-montaj jumystary 90 paıyzǵa aıaqtalǵan. Bul nysan 500 gektar sýarmaly jerdi sýmen qamtýǵa múmkindik beredi.
«Barlyq jumys zamanaýı sapa standarttaryna saı júrgizilip jatyr. Jańa sý qoımalary tasqyn jáne erigen qar sýyn tıimdi paıdalanýǵa jol ashady, bul sý resýrstary azaıyp jatqan jaǵdaıda asa mańyzdy. Qosymsha sýarmaly alqaptardy ıgerýge, sondaı-aq Bógen sý qoımasyndaǵy sý deńgeıin qaýipsiz retteýge múmkindik týady. Aýyl sharýashylyǵy, balyq sharýashylyǵy, mal sharýashylyǵy men týrızmdi damytýǵa qolaıly jaǵdaı jasalady. Gıdrologııalyq esepteýlerge sáıkes, Bógen ózeni arqyly ortasha jyldyq sý aǵyny 165 mln tekshe metrge jetedi. Sondyqtan bul sýdy jınap, azamattardyń qajettiligine baǵyttaý mańyzdy», - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, BQO-da eki sý qoımasy salynady.