Túrkistan oblysynda jalǵyzbasty keıýana jyńǵyl arasynda turyp kelgen

TÚRKІSTAN. KAZINFORM – Shardaradan 17 shaqyrym jerdegi kól mańynda jalǵyz turatyn apany ýchaskelik polıtsııa qyzmetkeri tapqan.

Áleýmettik jelide taraǵan vıdeodan keıýananyń qazylǵan jerdi úı etip panalaǵanyn kórýge bolady. Іshine qoldan pesh jasap, jaǵyp otyrǵan. Vıdeo avtory bul jaǵdaıdyń Shardara qalasynyn 17 shaqyrym jerde bolǵanyn aıtady. 

Al, jergilikti aýdan ákimdigi keıýana Shymkent qalasyndaǵy ońaltý ortalyǵyna jetkizilgenin málimdedi. 

«Azamatshanyń turǵan jeri jergilikti polıtsııa qyzmeti arqyly Shardara aýdanyna qarasty Jaýshyqum aýylynyń mańynan 1 aqpan kúni anyqtaldy. Sóıleý qabileti nashar bolǵandyqtan aty-jónin anyqtaý qıyndyq týdyrdy. Sáıkesinshe, tabylǵan kúnnen bastap jeke basyn anyqtaý jumystaryn júrgizý maqsatynda, sol kúni Shymkent qalasyndaǵy ońaltý ortalyǵyna jetkizildi. Búgingi kúni ońaltý ortalyǵynda tıisti jumystar júrgizilýde» - delingen Shardara aýdany ákimdigi usynǵan aqparatta.

Al, jelide jarııalaǵan vıdeoǵa oqyrmandar tarapynan túrli pikirler jazylyp jatyr. Olardyń arasynda, «Bul apaıdyń týǵan týystary qaıda, buryńǵy turǵan úıi qaıda, bir jerde turyp jumys istegen shyǵar», «Apamyzdy qarttar úıine jaıǵastyrsa jaqsy bolar edi», «Bul kisiniń aıdalada turýyna ne sebep», «Adam sengisiz eken...», «Mıǵa qonbaıdy, túsiniksiz jaǵdaı», «Bılikten buryn el jurty, ımamy bar aýyl shyǵar» degen jazbalar bar.