Túrkistan oblysynda jalǵan ınspektor júk kóligin toqtatyp, para talap etken

TÚRKІSTAN. KAZINFORM-Kórshiles elden kelgen júk kóliginiń júrgizýshisi kúdikti azamatty jasyryn beınejazbaǵa túsirip alǵan. 

Áleýmettik jelide taraǵan vıdeodan er adamnyń azamattyq kıimde ekeni baıqalady. Ol ózin quzyrly organ qyzmetkerimin dep tanystyryp, ashyq túrde aqsha talap etken.

Beınejazbada kúdiktiniń para suraǵan sózderi anyq estiledi. Ol júrgizýshiniń qujattaryn tekserip, kólikti tarazyǵa tartatynyn aıtqan. Eger aqsha bermese, kelesi kúni jolyǵatynyn eskertken.

Oqıǵaǵa baılanysty Kólik mınıstrligi resmı málimdeme taratty.

— Beınejazba boıynsha ishki tekseris júrgizildi. Atalǵan adamnyń kólik ınspektory emes ekeni anyqtaldy. Mundaı jaǵdaılar týyndaǵan jaǵdaıda Kólik mınıstrliginiń ahýaldyq ortalyǵyna 98-35-35 nómiri arqyly habarlasýǵa bolady, — delingen vedomstvo aqparatynda.

Aıta keteıik, budan buryn Túrkistan oblysynda kolledj stýdentiniń máıiti tabylǵanyn jazǵan bolatynbyz.