Túrkistan oblysynda zeınetaqy men járdemaqy taǵaıyndaýda 4 myńnan astam kemshilik anyqtaldy
TÚRKІSTAN. KAZINFORM — Oblysta jalpy 786 576 azamat áleýmettik tólemdermen qamtylǵan. Onyń ishinde 213 086 azamat jasyna baılanysty zeınetaqy, 194 135 azamat bazalyq zeınetaqy, 379 355 azamat memlekettik járdemaqy alady.
Halyqty áleýmettik qorǵaý salasyndaǵy retteý jáne baqylaý komıteti Túrkistan oblysy boıynsha departamentiniń málimetinshe, «E-maket» avtomattandyrylǵan aqparattyq júıesi arqyly bıyl 196 443 áleýmettik tólem taǵaıyndalǵan. Onyń 92 019-y alǵash ret taǵaıyndalsa, 104 424 tólem qaıta qaralyp, bekitilgen.
— 2026 jyldyń 8 aıynda óńirde zeınetaqy men járdemaqy taǵaıyndaý kezinde 4236 jaǵdaıda kemshilik anyqtalyp, keri qaıtaryldy. Negizgi sebepter — eńbek kitapshalaryn rásimdeý talaptarynyń saqtalmaýy, uıym móriniń anyq bolmaýy, tabystyń rastalmaýy jáne mindetti aýdarymdardyń durys júrgizilmeýi. Al járdemaqylar boıynsha qujattardyń talapqa saı usynylmaýy sebep bolǵan, — delingen vedomstvo habarlamasynda.
Sonymen qatar 53 zeınetaqy men járdemaqy jáne 2636 memlekettik kepildik tólemi belgilengen talaptarǵa sáıkes kelmeýine baılanysty taǵaıyndalmaǵan.
Buǵan deıin 1 qazannan bastap jumyssyz azamattarǵa kórsetiletin kómektiń ózgeretinin habarlaǵan edik.
