Túrkistan oblysynda zaýyttan shyǵatyn jaǵymsyz ıiske aýyl turǵyndary narazy
TÚRKІSTAN. KAZINFORM – Túrkistan oblysy Tólebı aýdany Birinshi mamyr aýylynda turǵyndar balmuzdaq óndiretin zaýyttyń káriz sýynan shyǵatyn sasyq ıiske shaǵymdandy.
Olar bul jaǵdaıdy aıtyp, tıisti mekemelerdiń tabaldyryǵyn talaı tozdyrǵan. Alaıda mardymdy nátıje bolmaǵan. Turǵyndardyń aıtýynsha, jaǵymsyz ıis birneshe jyldan beri «Balmuzdaq» zaýytynyń aýmaǵynan taraıdy.
– Bul máseleniń bizdi mazalap kele jatqanyna 20 jyldaı ýaqyt boldy. Turǵyndar úılerin satýǵa májbúr. Óıtkeni jaz mezgilinde tynys alý tipti qıyn. Táýlik boıy qurylǵylardyń shýy estiledi. Qanshama ret shaǵymdandyq. Nátıjesinde aıyppul salynady, odan múńkigen ıis ketip jatqan joq. Qazir zaýyt keńeıtilip, qurylys júrgizilmek. Bári zań sheńberinde bolsa, qarsy emespiz, biraq zaýyttyń turǵyndarǵa úlken zardaby tıip jatyr, – deıdi aýyl turǵyny Juldyzhan Shanbaev.
Búginde aýylda 7500-nan asa adam turady. Ásirese, zaýyttyń mańaıynda turatyn halyq qatty narazy. Mundaǵy turǵyndar óz úıinen ketýge asyǵatyn kúıge jetken. Al kásiporyn bolsa tóńirekti jaılaǵan jaǵymsyz ıis boıynsha tek aıyppul tóleýmen shekteledi.
Zaýyt basshylyǵy ıisti joıý úshin ótken jyly arnaıy qaldyq sýlardy tazalaıtyn qurylǵylar satyp alynǵanyn aıtty. Kelesi jyly Qytaıdan qosymsha qondyrǵylardy ákelý boıynsha kelissóz júrgizilip jatyr eken.
Aýyl ákimi Baqytbek Sattarulynyń aıtýynsha, Lengirde káriz júıesiniń qurylysy bastalǵan. Zaýyttyń káriz qubyry osyǵan tikeleı qosylmaq.
– Smetalyq qujattar jasalynyp qoıdy. Onyń arasy 10 shaqyrymnan asady. Sol iske assa, bul másele túbegeıli sheshilýi múmkin. Ol endi naqty belgisiz, aldaǵy jyldardyń enshisinde, – dedi aýyl ákimi bizge bergen jaýabynda.
Qazir atalǵan zaýyt basshylyǵy óndiristi keńeıtý maqsatynda kásiporynmen irgeles jatqan aýmaqtaǵy birneshe azamattyń turǵyn úıin satyp alyp, qurylys jumystaryn bastap ketken.
Budan buryn túrkistandyq sharýalar maqta baǵasyna qatysty narazylyq bildirgenin jazǵan edik.