Túrkistan oblysynda zaýyt aýmaǵyndaǵy 170 tonna maqta janyp ketti
TÚRKІSTAN. KAZINFORM — Maqtaaral aýdanyndaǵy maqta óńdeý zaýytynyń aýmaǵynda órt shyǵyp, 170 tonna maqta órtendi.
Túrkistan oblysy Tótenshe jaǵdaılar departamentiniń málimetinshe, 17 qazanda saǵat 14:30–da Maqtaaral aýdanyndaǵy Jetisaı — Atakent tasjoly boıynda ornalasqan maqta óńdeý zaýytynyń ashyq aýmaǵynda órt shyqqany týraly habarlama túsken.
— Zaýyt aýmaǵyndaǵy jalpy salmaǵy 700 tonna maqta jıyntyǵynyń ishinen 170 tonnany quraıtyn tórt maqta býnty janǵan. Órt 242 sharshy metr aýmaqty sharpydy, — dep habarlady oblystyq TJD.
TJM qutqarýshylarynyń jedel áreketteriniń nátıjesinde órt tolyq sóndirildi.
Oqıǵa saldarynan zardap shekkender joq. Qazirgi ýaqytta órttiń shyǵý sebebi anyqtalyp jatyr.
Aıta keteıik, buǵan deıin Túrkistan oblysynda 260 tonna maqtanyń janyp ketkeni týraly habarlanǵan bolatyn.
