Túrkistan oblysynda zańsyz veıp tsehy jabylyp, kólik tárkilendi
TÚRKІSTAN. KAZINFORM - Saıram aýdandyq sotynda veıp-temeki ónimderin zańsyz óndirý jáne qylmystyq jolmen kelgen aqshany zańdastyrý faktileri boıynsha qylmystyq is qaraldy.
Sot materıaldaryna sáıkes, 2024 jyldyń qańtarynda eki sottalýshylar ózderi ashqan seriktestiktiń atyna temeki buıymdaryna arnalǵan hosh ıistendirgishter men suıyqtyqtardy, ónimdi avtomatty túrde oraıtyn qural-jabdyqty shetelden satyp alǵan. Sondaı-aq veıp tabagi men ony usaqtaıtyn mashınany alǵan olar Aqsýkent aýylynan ǵımarat jaldap, 11 jaldamaly jumysshyny jumysqa qabyldap, tseh ashqan.
2025 jyldyń aqpanynda óndiris ornyn jasyrý maqsatynda olar tsehti Beskepe aýylyndaǵy ǵımaratqa kóshirgen. Tergeý dereginshe, 2024 jyldyń maýsymynan 2025 jyldyń naýryzyna deıin zańsyz óndiris arqyly 38 mln teńgeden astam paıda tapqan.
Budan bólek, sottalýshyniń biri qylmystyq jolmen kelgen aqshany zańdastyrý maqsatynda 2022 jylǵy «Toyota Hilux» avtokóligin satyp alyp, ony úshinshi tulǵa atyna rásimdegen.
Sotta prokýror aıyppul túrindegi jaza taǵaıyndaýdy surady. Sottalýshylar da qylmysyn moıyndap, aıyppul kesýdi ótingen.
Sot úkimimen sottalýshynyń birine 7 mln 864 myń teńge aıyppul salynsa, ekinshisine 3 mln 932 myń teńge aıyppul taǵaıyndaldy. Sondaı-aq «Toyota Hilux» avtokóligi memleket paıdasyna tárkilendi.
- Sot jaza taǵaıyndaý kezinde aıyptylardyń buryn sotty bolmaǵanyn, jasaǵan qylmysyn moıyndap, ókinýin, otbasylyq jaǵdaıyn jáne jas balalary baryn eskerdi. Aýyrlatatyn mán-jaı retinde qylmysty adamdar toby aldyn ala sóz baılasyp jasaǵany tanyldy. Úkim zańdy kúshine engen joq, - delingen Túrkistan oblystyq sotynyń baspasóz qyzmeti taratqan aqparatta.
Aıta keteıik, budan buryn Shymkenttegi M.Áýezov atyndaǵy ýnıversıtettiń burynǵy basshylaryna úkim shyqqanyn jazǵan bolatynbyz.