Túrkistan oblysynda zańsyz tasymaldanǵan 11 tonnadan astam munaı ónimi tárkilendi

TÚRKІSTAN.KAZINFORM — Janar-jaǵarmaıdy zańsyz tasymaldaǵan 15 kólik pen 2 avtobýs aıypturaqqa qoıyldy.

Oblystyq kásipkerlik jáne ónerkásip basqarma basshysynyń orynbasary Nurgúl Ábdrazaqovanyń aıtýynsha, shekaralyq aımaqtarda aýdandyq prokýratýra jáne keden beketiniń qyzmetkerleri birlese reıd ótkizgen. Nátıjesinde Saryaǵash qalasyndaǵy «Qaplanbek» keden beketine jaqyn ornalasqan birqatar janar-jaǵarmaı stantsasynda tehnıkalyq qaýipsizdik sharalarynyń saqtamalmaǵany anyqtalyp, jaýapty basshylarynan túsinikteme alynǵan. 

Sondaı-aq, keı azamattar 10 lıtrlik qutylarmen AI-92 markaly benzınin shekaradan ótkizbekshi bolǵan. Bul jaǵdaı boıynsha da tıisti sharalar qabyldanyp otyr.

Qańtar-aqpan aılarynda júrgizilgen reıd barysynda 15 jeńil kólik jáne 2 avtobýs aıyp turaǵyna qoıylyp, qujattary sotqa ótken. Qazirgi tańda, sot úsh kólikke sheshim shyǵaryp, zań aıasynda jaýapkershilik belgiledi. 

Jalpy, jyl basynan beri atqarylǵan jumystyń nátıjesinde janar-jaǵarmaıdy zańsyz tasymaldaǵan 140 derek tirkelip, 5,9 tonna benzın, 5,6 tonna dızel otyny tárkilengen. 
Búgin oblys ákiminiń orynbasary Nurbol Turashbekovtiń tóraǵalyǵymen Túrkistan oblysyndaǵy munaı ónimderi naryǵyndaǵy jaǵdaı boıynsha óńirlik shtab otyrysy ótti.
Jıynda janar-jaǵarmaı beketterine baqylaýdy kúsheıtý tapsyryldy.

Aıta keteıik, budan buryn Túrkistan oblysynda jabdyǵy urlanǵan ındýstrıaldy aımaq jumys istemeı turǵandyǵyn jazǵan bolatynbyz.