Túrkistan oblysynda zańsyz snıýs óndiretin úsh jasyryn tseh joıyldy
ASTANA. KAZINFORM – Qarjylyq monıtorıng agenttigi Túrkistan oblysy boıynsha departamenti azamattardyń ómiri men densaýlyǵyna qaýip tóndiretin temeki ónimderin – snıýsti zańsyz daıyndap, taratýmen aınalysqan toptyń qyzmetin toqtatty.
Jedel-izdestirý is-sharalary barysynda Keles jáne Ordabasy aýdandary aýmaǵynda ornalasqan úsh jasyryn tsehtyń jumysy áshkerelenip, tolyqtaı joıyldy.
- Zańsyz óndiris jalpy aýdany 500 sharshy metrden asatyn nysandarda uıymdastyrylǵan. Onda kún saıyn shamamen 20 adam jumys istegen. Tyıym salynǵan ónimder elimizdiń barlyq óńirlerine júıeli túrde taratylyp otyrǵan.
Zańsyz aınalymnan 1 mln-nan astam daıyn ónim, 30 tonna temeki, 2 mln qaptama paketi, túrli hosh ıistendirgishter men ýly hımııalyq qospalar, sondaı-aq óndiristik arnaıy jabdyqtar tárkilendi. Tárkilengen shıkizat kólemi shamamen 60 mln dana bir rettik snıýs óndirýge jetkilikti bolǵan, - dep jazdy agenttikten.
Sot sanktsııasymen zańsyz qyzmetten túsken qarajatqa satyp alynǵan eki avtokólikke tyıym salyndy.
QR Qylmystyq-protsestik kodeksiniń 201-babyna sáıkes ózge málimetter jarııa etilmeıdi.
Qarjylyq monıtorıng agenttigi snıýs quramynda nıkotın men ýly hımııalyq zattar bar ekenin eskertedi. Mundaı ónim tez táýeldilikke ákeledi, aýyz qýysynyń shyryshty qabatyn zaqymdaıdy jáne júrek-qantamyr aýrýlary men ýlaný qaýpin aıtarlyqtaı arttyrady.
Aıta keteıik, Jambylda atpen temeki kontrabandasyn ótkizbek bolǵan sheteldik azamat ustaldy.