Túrkistan oblysynda zańsyz oıyn bıznesinen túsken 20 mln teńge memleket paıdasyna tárkilendi

TÚRKІSTAN. KAZINFORM – Túrkistan oblysynyń turǵyny zańsyz oıyn bıznesin uıymdastyryp, asa iri kólemde tabys alǵany úshin kináli dep tanyldy. Ol osyǵan uqsas qylmys jasaǵany úshin buryn da sottalǵan. 

Qylmystyq istiń materıaldaryna sáıkes, ol zańsyz oıyn bıznesinen 20 mıllıon teńge kóleminde kiris tapqan. 

Saryaǵash aýdandyq soty ony 4 jylǵa bas bostandyǵynan aıyrý jazasyna kesip, Qylmystyq kodekstiń 63-baby boıynsha jazany shartty túrde taǵaıyndady.

Apellıatsııalyq sotta prokýrordyń ótinishi qanaǵattalyp, shartty jazanyń kúshin joıý týraly sheshim qabyldandy. 

Sot aktileriniń zańdylyǵyn qadaǵalaý barysynda zańsyz tabys retinde alynǵan 20 mıllıon teńgeniń tárkilenbegeni anyqtaldy.

Bas prokýratýranyń kassatsııalyq shaǵymy boıynsha sot sheshimderi ózgertilip, atalǵan qarajat memleket paıdasyna alynǵan.

Zańsyz oıyn bıznesin uıymdastyrý qylmysy úshin múlik tárkilenip, 4-ten 7 jylǵa deıin bas bostandyǵynan aıyrý jazasy qoldanylatyny eskertiledi.

Eske sala keteıik, buǵan deıin Ázerbaıjan azamaty Qazaqstandaǵy zańsyz oıyn bıznesin shetelden basqaryp otyrǵanyn jazǵan edik.