Túrkistan oblysynda zańsyz ken óndirgender ustaldy
TÚRKІSTAN. KAZINFORM — Kentaý qalasynyń mańynda «barıt» kenin ruqsatsyz qazǵan eki jergilikti turǵyn men shetel azamaty jaýapqa tartyldy.
Túrkistan oblysynyń mamandandyrylǵan tabıǵat qorǵaý prokýratýrasy, oblystyq ónerkásip basqarmasy jáne oblystyq polıtsııa departamenti birlesip, jer qoınaýyn zańsyz qazǵandardy anyqtady.
Quzyrly organ ókilderi dron qurylǵysynyń kómegimen Kentaý qalasynyń Oıyq eldi mekenindegi taýly aımaqta reıd ótkizdi. Nátıjesinde «barıt» qatty qazba baılyǵyn ruqsatsyz qazyp jatqan Kentaý qalasynyń eki turǵynyn ustady. Olar Ózbekstan azamatyn zańsyz jumys kúshi retinde paıdalanǵan.
— Quqyq buzýshylyq jasaǵan eki azamat ákimshilik jaýapkershilikke tartyldy. Al shetel azamatyna qatysty ákimshilik hattama toltyrylyp, is Kentaý qalalyq sotynyń qaraýyna jiberildi, — delingen oblys ákimdigi taratqan aqparatta.
Sonymen qatar «barıt» kenin óndirý barysynda zań talaptary men lıtsenzııalyq mindettemelerdiń saqtalmaýyna baılanysty «Merıdıkt» JShS-ne berilgen «Qatty paıdaly qazbalardy barlaýǵa arnalǵan» lıtsenzııany keri qaıtaryp alý máselesi kóterildi. Osyǵan oraı tıisti sharalar qabyldaý úshin Ónerkásip jáne qurylys mınıstrligine resmı aqparattyq hat joldandy.
Budan buryn Túrkistan oblysynda 221 jer qoınaýyn paıdalanýshynyń tek 98-i ǵana resmı rásimdelgenin jazǵan edik.