Túrkistan oblysynda zamanaýı kapsýlaly úıler salynady
TÚRKІSTAN. KAZINFORM — Túrkistan oblysynda týrızm men turǵyn úı ınfraqurylymyn damytýǵa baǵyttalǵan jańa biregeı ınvestıtsııalyq joba iske asyryla bastady. Oblys ákimdigi men Qytaı Halyq Respýblıkasynyń iri óndiristik kompanııalarynyń biri — «Shandong Kamoya Smart Culture and Tourism Technology Co., Ltd.» arasynda ózara tıimdi seriktestik ornady.

Túrkistan oblysynyń ákimi Nuralhan Kósherov bastaǵan óńir delegatsııasy QHR-daǵy Lını qalasyna sapar jasap, «Shandong Kamoya» zaýytynyń jumysymen, óndiristik qýatymen jáne ınnovatsııalyq sheshimderimen tanysty. Qazirgi ýaqytta bul zaýyt «KHAN TAU» brendimen kapsýlaly úıler shyǵarýda. Endi osy tehnologııalar Túrkistanda óndiriletin bolady.

Byltyr jeltoqsanda Túrkistan oblysy delegatsııasynyń Qytaıǵa jasaǵan resmı sapary aıasynda bastalǵan kelissózder nátıjesinde taraptar birlesken óndiristi uıymdastyrýǵa ýaǵdalasty. 2025 jyldyń qańtarynda qytaılyq seriktester Túrkistan oblysyna arnaıy kelip, óńirdiń ınvestıtsııalyq áleýetimen tanysty. Qazirgi tańda «BNK GROUP LTD» JShS men «Shandong Kamoya Smart Culture and Tourism Technology Co., Ltd.» arasynda kapsýlaly úılerdi Túrkistanda jınaý jáne óndirý boıynsha kelisim jasalyp, alǵashqy úıler daıyndaldy. Olar jaqyn arada óńirdegi «KHAN TAU» demalys aımaǵyna jóneltiledi.

Kapsýlaly úı — bul jańa býyndaǵy modýldik qurylys úlgisi. «Shandong Kamoya» kompanııasynyń «Camoya ǵarysh kapsýlasy» joǵary sanattaǵy kempıngterge, qonaqúılerge jáne glempıngke arnalǵan zamanaýı sheshim retinde ázirlengen. Ol kemper, mını-qonaqúı jáne modýldik úıdiń fýnktsııalaryn biriktiredi. Mundaı úılerge jer telimin rásimdeýdiń qajeti joq, qurylys ekologııalyq taza jáne energııa únemdeıtin prıntsıpterge negizdelgen. Kapsýla ishki jabdyqtaryna kelsek, panoramalyq terezeler, jatyn jáne turǵyn aımaqtar, tolyqqandy as úı men sanıtarlyq torappen qamtylǵan. Sonymen birge «aqyldy úı» júıesi, kondıtsıoner, mýltımedıa jabdyqtary jáne taǵy basqa jaıýdyqtarmen jabdyqtalǵan. Mundaı ǵımarattardy týrıstik keshender men glempıngter, modýldik keńseler men mobıldi úıler, kórme pavılondary, dala zerthanalary, qonaqúılerge paıdalanýǵa bolady. 50 jylǵa deıin qyzmet etýge jaramdy.

— Túrkistan oblysynda týrızm men turǵyn úı ınfraqurylymyn jańǵyrtý baǵytynda mundaı tehnologııalardyń mańyzy zor. Biz sizdermen naqty jobalardy birlese júzege asyrýǵa daıynbyz. Osy arqyly óńirdiń óndiristik, týrıstik, ınfraqurylymdyq áleýetin kóterýge kúsh salamyz, — dedi oblys ákimi Nuralhan Kósherov.
Kezdesý sońynda delegatsııa ókilderi kompanııa basshylyǵyna jyly qabyldaýy men tájirıbe almasýǵa múmkindik jasaǵany úshin alǵys aıtty.
Shandýn — Qytaıdyń soltústik-shyǵysyndaǵy tarıhı jáne ekonomıkalyq áleýeti zor aımaq. 2023 jylǵy kórsetkish boıynsha óńirdiń jalpy óńirlik ónimi (JÓÓ) 9 trıllıon ıýannan asyp ($1,3 trıllıon), el boıynsha alǵashqy úshtikke endi. Bul óńirdiń ǵylym, eksport, óndiris, kólik ınfraqurylymy salalaryndaǵy qarqyndy damyǵanyn kórsetedi.
Aıta keteıik, budan buryn Túrkistan oblysynda 47 kóshege ardagerlerdiń esimi beriletindigin jazǵan bolatynbyz.