Túrkistan oblysynda vaktsınadan bas tartqan 47 azamat qyzylshamen aýyrdy
TÚRKІSTAN. KAZINFORM – Óńirde qyzylsha juqtyrǵandardyń basym bóligi – balalar. Bul týraly Túrkistan oblysynyń Bas memlekettik sanıtarııalyq dárigeri Nurbek Nyshanov málimdedi.
Jyl basynan beri óńirde 299 adam qyzylsha juqtyrǵan. Onyń 81,2 paıyzyn 14 jasqa deıingi balalar qurap otyr. Qazirgi tańda óńirdegi 172 104 bala vaktsına alǵan. Bul ekpe alýǵa mindetti balalardyń 91,1 paıyzyn quraıdy.
«Oblysta qosymsha jappaı ımmýndaýdan bas tartýshylar joq. Degenmen 12-18 aılyq jáne 6 jastaǵy balalarǵa salynatyn josparly qyzylshaǵa qarsy vaktsınadan 560 azamat bas tartqan. Qyzylshamen aýyrǵandardyń 68,1 paıyzyn vaktsına saldyrmaǵandar qurap otyr. Jyl basynan beri ekpeden bas tartqan 47 adam qyzylshamen aýyrdy. Óńirde ólim jaǵdaıy tirkelmedi», - dedi Nurbek Nyshanov.
Búginde qosymsha jappaı ımmýndaýmen qamtamasyz etý maqsatynda oblysqa Úndistan elinde shyǵarylǵan 170 230 doza vaktsına jetkizilgen. Sanıtarııalyq-epıdemıologııalyq baqylaý basqarmasynyń qyzmetkerleri men densaýlyq saqtaý salasynyń mamandary jergilikti din ókilderimen jáne taǵy da basqa quzyretti organdarmen birlesip, vaktsınadan bas tartýshylar arasynda túsindirý jumystaryn júrgizip jatyr.
Al, Túrkistan oblysy densaýlyq saqtaý basqarmasynyń basshysy Ashan Baıdýalıev qyzylshamen naýqastanýshylarmen baılanysta bolǵandardyń barlyǵy 21 kúnge medıtsınalyq baqylaýǵa alynyp jatqanyn jetkizdi. Sondaı-aq dertke 4 jasqa deıingi balalar jıi shaldyǵatynyn aıtty. Infektsııanyń tirkelýi balabaqshalar men mektepterde de bolǵan.
Epıdemıologııalyq ahýalǵa baılanysty oblystaǵy medıtsınalyq uıymdarda juqpaly aýrýlarǵa arnalǵan tósek-oryn sany qosymsha 407-ge kóbeıtilgen. Qazir aýrýhanalarda jalpy 1 032 tósek-oryn bar.
