Túrkistan oblysynda úı janýarlarynan zardap shekkender sany artty

TÚRKІSTAN. KAZINFORM - Túrkistan, Kentaý, Arys qalalary men Otyrar aýdanynda sońǵy bir jylda úı janýarlarynan zardap shekkender sany edáýir artqan.

Bıylǵy jyldyń basynan beri aımaqta 4697 adam ıt, mysyq, úı jáne jabaıy janýarlardyń shabýylyna ushyrap, túrli deńgeıde jaraqat alǵan. Bul – alańdatatyn kórsetkish.

Sandarǵa zer salsaq, jaraqattanǵandardyń basym bóligin ıq qapqan. Óńirde mundaı 3388 jaǵdaı tirkelgen. Al mysyqtan jaraqat alǵandar – 994 adam. Sondaı-aq, maldan 105 adamǵa qaýip tónse, jabaıy janýarlardan 210 turǵyn zardap shekken. Eń soraqysy, myńnan astam jaǵdaıda adamdardy buralqy ıtter qapqan.

Túrkistan oblysynyń sanıtarııalyq-epıdemıologııalyq baqylaý departamenti usynǵan málimetke súıensek, Shardara, Túlkibas, Qazyǵurt, Maqtaaral, Jetisaı jáne Otyrar aýdandarynda kórsetkish oblystyq ortasha deńgeıden joǵary. Degenmen, mamandardyń aıtýynsha, 2025 jyldyń toǵyz aıynda oblys turǵyndary arasynda asa qaýipti qutyrý aýrýy tirkelmegen.

Dárigerler turǵyndarǵa janýarlar minez-qulqyndaǵy ózgeristerge muqııat bolýdy eskertedi.

-Eger kúdikti jaǵdaı baıqalsa, dereý mal dárigerine habarlasý qajet. It pen mysyqty asyraıtyn árbir januıa olardy ýaqytyly vaktsına ektirip, qaraýsyz qaldyrmaýy tıis. Óıtkeni janýarlarǵa jaýapkershilikpen qaraý – tek zań talaby ǵana emes, árbirimizdiń qaýipsizdigimizdiń kepili, – delingen aqparatta.

Al, Túrkistan oblysynyń veterınarııa basqarmasy usynǵan málimetke súıensek, búginde Saýran, Saıram, Saryaǵash aýdandary men Arys qalasynda ýaqytsha ustaý oryndary men veterınarııalyq klınıkalar jumys isteıdi. Onda janýarlardy egý, zararsyzdandyrý is-sharalary júrgiziledi. Al, qalǵan aýdandarda ýaqytsha ustaý oryndary bolmaǵandyqtan veterınarlar aýlanǵan ıt pen mysyqty tasymaldaýǵa májbúr.

-Jyl basynan beri oblys turǵyndary tarapynan 109 biryńǵaı baılanys ortalyǵyna qańǵybas janýarlarǵa qatysty myńdaǵan aryz-shaǵym túsken. Sonyń negizinde 38 665 buralqy ıt pen mysyq aýlandy. Olardyń arasynan qutyrý aýrýy anyqtalmaǵanymen, kóshelerde baqylaýsyz júrgen janýarlardyń kóptigi qaýiptiń seıilmegenin kórsetedi. Ásirese Túrkistan, Kentaý, Arys qalalary men Otyrar aýdanynda sońǵy bir jylda úı janýarlarynan zardap shekkender sany edáýir artqan, - delingen basqarma aqparatynda.

Aıta keteıik, budan buryn Túrkistan oblysynda jylytý maýsymy qashan bastalatyndyǵyn jazǵan bolatynbyz.