Túrkistan oblysynda úsh aıdan beri jalaqy almaǵan muǵalimder ákimdikke shaǵymdandy
TÚRKІSTAN. KAZINFORM — Túrkistan oblysynda jekemenshik mektep muǵalimderi úsh aıdan beri jalaqylaryn almaǵan. Tózimi taýsylǵan saryaǵashtyq ustazdar aýdan ákimdigine baryp, máselelerin tez arada sheshýdi talap etti.
Jınalǵandardyń arasynda tek muǵalimder ǵana emes, aspazdar, tipti mektep quryltaıshylary da bar. Olar oqý jylynyń basynan beri aqysyz jumys istep júrgenderin aıtady.
Bul qıyndyq tek muǵalimderge ǵana emes jekemenshik mektep ashqan kásipkerlerge de aýyr tıip otyr. Buryn Bilim jáne ǵylym mınıstrligine qarasty «Qarjy ortalyǵy» arqyly qarjylandyrylǵan mektepterge bıyl birneshe aıdan beri qarajat túspegen. Máselen, 700 oryndyq mektep salǵan kásipker Isaq Ospanov memleketten 270 mln teńgeden astam qarjyny ala almaı otyr. Tipti oǵan 400-ge jýyq oqýshyǵa qarjylandyrý toqtaýy múmkin degen habarlama jiberilgen.
— 400 bala qysqarǵanda soǵan sáıkes 35-40 muǵalimdi de qysqartýym kerek. Nesıe tóleıtin merzimniń ýaqyty ótip, ósimpul júrip jatyr. Biz 4 jerden nesıe aldyq. Keshe jalaqy bolmaǵan soń nesıeniń esebinen muǵalimderge avans berdim. Muǵalimderdi solaı ustap qalmasaq, basqa amal joq. Qazirdiń ózinde jumystan ketip qalǵandary bar, — dedi ol.
Al aýdan ákimi Arman Abdýllaev jaǵdaıdyń ýshyǵýyna qarjylandyrý júıesiniń ózgerýi sebep bolǵanyn aıtty. Buǵan deıin respýblıkalyq deńgeıde tólengen qarajatpen qamtý bıyldan bastap jergilikti ákimdikterge júktelgen.
— Bıyldan bastap ol júıe ózgerdi. Endi qarjyny oblystyq bıýdjetten tıisti basqarma tólesin degen sheshim qabyldanǵan. Basqarma qazir túgendeý jumystaryn júrgizip jatyr. Bir qoldan kelesi qolǵa ótkende barlyǵyn AKT-imen qabyldap alý kerek, — dedi ol.
Búginde oblysta 157 jekemenshik mektep jumys isteıdi.
Túrkistan oblystyq bilim basqarmasynyń málimetinshe, Oqý-aǵartý mınıstrliginiń № 251 buıryǵyna jáne oblys ákimdiginiń qaýlysyna sáıkes, 7 qarashadan bastap jekemenshik mektepterdi qarjylandyrýdyń pılottyq jobasy júzege asyrylyp jatyr.
— Oblystaǵy jeke mekteptiń barlyǵy Qarjy mınıstrligine qarasty Aqparattyq esepteý ortalyǵynyń «e-Qazyna» portalynda tıisti qujattaryn júktep, kelisimshart tolyqtaı jasalyndy. Qazirgi tańda «BilimClass.kz» platformasy arqyly balalardyń saǵatyna qatysý kórsetkishteri men olardyń basqa bilim berý uıymyna aýysý faktileri tekserilip jatyr. Málimetter tolyqtaı tekserilip, «e-Qazyna» júıesine tolyq kólemde júktelgennen keıin kórsetilgen qyzmetterdiń oryndalý aktisi rásimdelip, Qarjy ortalyǵyna joldandy. Búginde Qarjy ortalyǵy arqyly 78 mektepke qarjy aýdaryldy, — delingen vedomstvo usynǵan aqparatta.
Budan buryn 2026 jyldan bastap jekemenshik mektepter qatań tsıfrlyq baqylaýǵa ótetinin jazǵan edik.