Túrkistan oblysynda úsh aýysymdy jáne apatty mektepterdiń máselesi qalaı sheshilip jatyr

TÚRKІSTAN. KAZINFORM – Óńirde 3 aýysymda bilim beretin eki mektep jáne bir apatty jaǵdaıdaǵy mektep bar.

Búginde Túrkistan oblysynda 29 «Keleshek mekteptiń» qurylysy júrgizilip jatyr. Onyń ishinde 13 mektep ótken jyly paıdalanýǵa berilse, bıyl taǵy 16 jańa mekteptiń qurylysy aıaqtalmaq.

Sonymen qatar jergilikti bıýdjet esebinen 17 jańa bilim nysanynyń qurylysy bastalǵan. Jalpy alǵanda, oblysta 115 mektepti qaıta jabdyqtaý men jańǵyrtý josparlanǵan bolsa, sonyń 41-i bıyl jańartylyp jatyr. Budan bólek, 59 mektepte aǵymdaǵy jóndeý jumystary júrgizilip jatyr. Nátıjesinde 2025 jyldyń ózinde oblys boıynsha 100-ge jýyq mektep jańartylmaq.

Qazirgi tańda óńirde 3 aýysymdy bilim beretin eki mektep jáne bir apatty jaǵdaıda turǵan mektep jumys istep tur.

– Oblysta 115 mektepti qaıta jabdyqtaý, ıaǵnı renovatsııalaý tizimine engizdik. Bıyl sonyń 41-i tolyq renovatsııadan ótip jatyr. Sondaı-aq 2026 - 2027 jyldary qalǵan mektepter kezeń-kezeńimen jańǵyrtýdan ótedi. Sol kezde, úsh aýysymdy jáne apatty mektepterdiń máselesi túbegeıli sheshiledi dep josparlanyp otyr. Úsh aýysymdy mektepke jaqyn ornalasqan 31 mektep bar. Munda bala sany óte kóp, aýyldar damyp jatyr, demografııalyq ósim de baıqalady. Bul máseleni «Jaıly mektep» jobasy men jekemenshik mektepter esebinen oqýshylardy bólý arqyly sheship jatyrmyz, — dedi Túrkistan oblysy Bilim basqarmasy basshysynyń mindetin atqarýshy Ǵalymjan Orynov.

Aıta keteıik, budan buryn Túrkistandaǵy áýejaı senimgerlik basqarýǵa beriletinin jazǵan bolatynbyz.