Túrkistan oblysynda turmystyq qaldyq tastaıtyn polıgondar talapqa saı emes
TÚRKІSTAN. KAZINFORM — Túrkistan oblysynyń aýmaǵynda 128 qatty turmystyq qaldyq tastaıtyn polıgon bar. Onyń ishinde 35-i aýdandyq bolsa, 40-y aýyl okrýginde ornalasqan. Al 50-i senimgerlik basqarýǵa berilgen. Taldaý nátıjesinde oblystaǵy polıgondardyń kópshiligi sanıtarlyq-ekologııalyq talaptarǵa sáıkes kelmeıtini anyqtaldy.
Túrkistan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ǵalymjan Tólepovtyń aıtýynsha, ótken jyly 3 polıgonnyń qurylysyna oblys bıýdjetinen 598 mln teńge qarjy bólinip, qurylys jumystary júrgizilgen.
— Bıyl polıgondardy ońtaılandyrý arqyly 33-i jabylýy tıis edi. Alaıda aýdan, qala ákimdikteri tarapynan tıisti jumys atqarylmaǵan. Sondaı-aq 29 polıgondy sanıtarlyq-ekologııalyq talaptarǵa sáıkestendirý kózdelgen. Qazirgi tańda aýdandyq bıýdjet esebinen Arys qalasynda — 3, Shardara aýdanynda — 3, Sozaq aýdanynda 4 polıgondy qalpyna keltirý jumystary júrgizilip jatyr. Jalpy quny — 537,7 mln teńge. Budan bólek, qaldyqtardy suryptaıtyn 7 jeli, qaıta óńdeıtin 3 qondyrǵy qoıý kózdelgen. Osy baǵytta Saryaǵash aýdanyndaǵy «Sadyk bereke» JShS «Jasyl damý» AQ mehanızmi arqyly qaldyqtardy suryptaý, qaıta óńdeý jáne ınfraqurylymdy damytý maqsatynda «Ónerkásipti damytý qory» AQ-nyń jeńildetilgen qarjylandyrýymen qaǵaz qaldyqtaryn qaıta óńdeý arqyly jumyrtqa qorabyn daıyndaıtyn qondyrǵysyn alyp jatyr, — dedi ol.
«Túrkistan oblysyn damytýdyń 2021-2025 jyldarǵa arnalǵan damý jospary» boıynsha, qaldyqtardyń qaıta óńdeý úlesi 2025 jylǵa 31 paıyzǵa jetkizý bekitilgen. Bıylǵy 10 aıda 30%-ǵa oryndalǵan. Kelesi jyly qaldyqtardyń qaıta óńdeý úlesin 33%-ǵa jetkizý josparlanyp otyr.
Sonymen qatar beı-bereket qoqys oryndaryn joıý maqsatynda «Qazaqstan Ǵarysh Saparynyń» túsirilimi nátıjesinde oblys aýmaǵynda 249 núkte (16 aýdanda) anyqtalyp, búginde tolyq tazalaý jumystary júrgizilgen.
Túrkistan oblysynda turmystyq qaldyq tastaıtyn polıgondardyń sanıtarlyq talapqa saı kelmeıtinin buǵan deıin de jazǵan edik.