Túrkistan oblysynda turmystyq qaldyq tarıfterin zańsyz esepteý faktileri anyqtaldy
ASTANA. KAZINFORM — Túrkistan oblysynyń mamandandyrylǵan tabıǵat qorǵaý prokýratýrasy oblys aýmaǵynda qatty turmystyq qaldyqtardy jınaýǵa qatysty tarıfterdi esepteýdiń zańdylyǵyna taldaý júrgizdi.
Vedomstvo deregine sáıkes, nátıjesinde jergilikti atqarýshy organdar tarapynan turmystyq qatty qaldyqtardy suryptaý jáne qaıta óńdeý jumystary oryndalmaǵan jáne oryndaýǵa quziretteri bolmaǵanyna qaramastan, negizsiz tólemder alynǵany anyqtaldy.
— Prokýrorlyq qadaǵalaý aktisiniń negizinde 8 aýdanda (Túrkistan qalasy, Shardara, Maqtaaral, Túlkibas, Qazyǵurt, Keles, Otyrar jáne Tólebı) turmystyq qatty qaldyqtardy suryptaý jáne qaıta óńdeý qyzmetteri alynyp, nátıjesinde tarıfter tómendetildi. Buryn tólengen qarajatty kelesi tólem kezeńderinde esepke alý arqyly qysqartýǵa qol jetkizilip, kináli tulǵalar tártiptik jaýapkershilikke tartyldy, — delingen habarlamada.
Sondaı-aq, qatty turmystyq qaldyqtardy jınaý qyzmetin kórsetýdi konkýrs ótkizý arqyly júzege asyrmaǵan 11 aýdannyń (Arys, Jetisaı, Maqtaaral, Ordabasy, Otyrar, Saryaǵash, Saýran, Sozaq, Túrkistan, Túlkibas jáne Tólebı) ákimdiktiń laýazymdy tulǵalaryna QR ÁQBtK-niń 163-baby 1-bóligimen úsh júz aılyq eseptik kórsetkish mólsherinde ákimshilik aıyppul salynyp, 5,4 mln teńge memleket bıýdjetine óndirildi.
Túrkistan oblysy prokýratýrasynyń saıty málim etkendeı, qazir qatty turmystyq qaldyqtardy jınaý qyzmetin kórsetý quqyǵy mindetti túrde konkýrs ótkizý arqyly júzege asyrylý satysynda. Atalǵan baǵyttaǵy jumystar jalǵasyn tabady.
Osyǵan deıin Talǵarda 33 kásipker elektr energııasyn joǵary tarıfpen tólep kelgenin jazdyq.
