Túrkistan oblysynda turǵyndar jańadan tartylǵan gaz jelisiniń sapasyna narazy
TÚRKІSTAN. KAZINFORM — Túrkistan oblysy Maqtaaral aýdanyna qarasty Táńirbergen Jaılybaev aýylynyń turǵyndary jańadan tartylǵan gaz jelisiniń sapasyna shaǵymdandy.
Atalǵan eldimekende gazben qamtý jumystary 2024 jyly bastalyp, bıyl naýryz aıynda aıaqtalǵan. Gaz berý rásimine aýdan ákimi de qatysqan. Alaıda jergilikti halyq júrgizilgen qurylys-montaj jumystary kelisimshart talaptaryna saı oryndalmaǵanyn aıtady.
Aýyl turǵyny Marat Abdalımovtyń sózinshe, keıbir metall tirekterde qubyrlardy bekitýge arnalǵan homýttar ornatylmaı, symmen baılanǵan. Sondaı-aq jaıaý júrginshiler aımaǵyndaǵy qubyrlardyń bıiktigi talapqa sáıkes kelmeıdi ári tirekter arasyndaǵy qashyqtyq ta saqtalmaǵan.
— Kóktemgi jaýyn-shashyn kezinde qazylǵan oryndardyń bári sýǵa toldy. Áli kúnge deıin qazylǵan jerler ashyq qalyp, balalar men malǵa qaýip tóndirip otyr. Tipti keıbir ornatylǵan gaz qubyrlarynyń ishinen sý aqqanyn kórdik. Bul qubyrlardyń ishi tolyq tazalanbaǵan. Kóshe qıylysyndaǵy sý qubyrlarymen araqashyqtyq ta saqtalmaǵan, nebári 30 santımetr. Al bul araqashyqtyq 1,5 metr bolýy tıis. Onyń ústine jumys barysynda 5-6 ret merdiger mekeme aýysty. Bizdiń talap — jumysty sapaly ári talapqa saı aıaqtap berý, — dedi ol.
Turǵyndardyń aıtýynsha, qurylys barysynda jaýapty tulǵalarǵa birneshe ret eskertý aıtylǵanymen, olardyń usynystary nazarǵa alynbaǵan. Soǵan qaramastan, gaz jelisi qujat júzinde talapqa saı dep tanylyp, paıdalanýǵa qabyldanypty.
Turǵyndar merdiger kompanııamen jasalǵan kelisimsharttaǵy talaptardyń tolyq oryndalmaǵanyn aıtyp, aýdandyq prokýratýraǵa aryzdanǵan. Biraq quzyrly organ tarapynan áli kúnge deıin naqty jaýap bolmaǵan.
Osy máselegege baılanysty Kazinform tilshisine Maqtaaral aýdany ákimdigi resmı túsinik berdi.
Ákimdik málimetinshe, Táńirbergen Jaılybaev eldimekenindegi gazben jabdyqtaý jelisiniń qurylysyna bıýdjetten 730,2 mln teńge bólingen. «Yntymaq Bes-Arys» JShS tarapynan qurylys-montaj jumystary júrgizilip, nysan paıdalanýǵa berilgen.
— Turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bólimi men merdiger mekeme arasynda jasalǵan kelisimshartqa sáıkes, nysanǵa 5 jyl kepildik merzimi qarastyrylǵan. Osyǵan baılanysty kemshilikterdi joıý maqsatynda merdiger mekemege tıisti hat joldandy. Anyqtalǵan aqaýlar 30 maýsymǵa deıin tolyq qalpyna keltiriledi, — dep habarlady aýdan ákimdigi.
Budan buryn Túrkistan oblysynda qurylysy bitpegen páterlerge tólengen 200 mln teńge bıýdjetke qaıtarylǵanyn jazǵan edik.
