Túrkistan oblysynda turǵyndar laı sý iship otyrǵanyna shaǵymdandy
TÚRKІSTAN. KAZINFORM — Tólebı aýdanyna qarasty Lenger qalasynyń turǵyndary kóp jyldan beri laı sý ishýge májbúr bolyp otyrǵanyn aıtyp, taǵy da dabyl qaqty.
Qala turǵyndarynyń aıtýynsha, bul birinshi ret bolyp otyrǵan jaǵdaı emes. Olar jyldar boıy aýyzsýdyń sapasyna shaǵymdanyp kele jatqanymen, másele áli kúnge deıin tolyq sheshimin tappaǵan. Turǵyndar mundaı sýdy ishý densaýlyqqa qaýipti ekenin aıtady. Olardyń sózinshe, las sý asqazan-ishek aýrýlaryn týdyryp, búırekke zııan keltiredi. Sońǵy ýaqytta dál osyndaı shaǵymmen dárigerge júginetinder de kóbeıgen.
Turǵyndardyń aıtýynsha, táýelsiz zerthana júrgizgen saraptama nátıjesinde sýda túrli bakterııalar anyqtalǵan.
Lenger qalasynyń turǵyny Olga Ivashkova sý máselesimen bes jyldan beri kúresip kele jatqanyn jetkizdi. Onyń sózinshe, eki jyl buryn da turǵyndar bul máselege baılanysty narazylyq bildirgen.
— Ondaı lastanǵan sýdy tipti janýarlarǵa da berýge bolmaıdy, al ony turmysta nemese taǵam daıyndaýǵa paıdalaný týraly aıtý da qıyn. Bizge keletin sýdyń sapasy tómen bolsa da, bir tekshe metri — 90 teńge. Buǵan deıin jaýapty mekemeler qubyrlardyń tozǵanyn aıtyp, qaladaǵy sý júıesi tolyq jańartylǵanyn málimdegen edi. Soǵan qaramastan sýdyń sapasy áli kúnge deıin talapqa saı emes, — dedi ol.
Lenger qalasynyń ákimi Maqsat Jumabaev aýyzsý máselesi ózekti ekenin joqqa shyǵarmaıdy. Onyń aıtýynsha, buǵan deıin qalaǵa bulaqtan tikeleı sý jetkizilgen. 2025 jyldyń sońynda úsh uńǵyma qazylyp, sol jerden sý berilgen. Alaıda tehnıkalyq aqaýlardyń saldarynan sý laılanǵan.
— Sýdyń laılanýynyń basty sebebi — «Dostyq» baǵytynan keletin qubyr jarylyp, jóndeý jumystary júrgizildi. Qaıta qosqan kezde sý laılanyp ketti, — dedi qala ákimi.
Máselege alańdaǵan turǵyndar aýyzsý máselesin sheshýdi talap etip, ákimdikke bardy.
Aýdan ákimi Erkeǵalı Álimqulov jaǵdaıdy turaqtandyrý úshin qajetti jumystar júrgizilip jatqanyn aıtty.
— Magıstraldyq sý qubyrynda eki ret aqaý boldy. Biz ony anyqtap, jóndedik. Sonymen qatar «Dostyq» uńǵymasyndaǵy nasos stantsııasy isten shyqty. Ony aýystyrdyq. Sý sapasynyń ýaqytsha nasharlaýyna osy jaǵdaılar áser etti, — dedi aýdan ákimi.
Qazirgi tańda aqaýdyń bári retke keltirilgen. Jergilikti sý arnasynyń ókilderi bul ýaqytsha qıyndyq dep sendirip otyr.
— Bıyldan bastap sý tolyǵymen jańa uńǵymalardan berilip jatyr. Buryn qubyrlar jyldar boıy súzgisiz jumys istegen. Apattyq ajyratýlar kezinde laı sý keletin. Sorǵy aýystyrǵanda nemese qubyr jarylǵanda sýdy ýaqytsha toqtatamyz. Aqaý joıylǵan soń, qubyr ishindegi alǵashqy sý mindetti túrde laı bolyp shyǵady, — dedi Sý arnasy dırektorynyń orynbasary Erbol Tantysbaev.
Jańa uńǵymalardy burǵylaý men qubyr tartý jumysyna bıýdjetten 197 mıllıon teńge bólingen. Eki aı buryn iske qosylǵan sý alý stantsııasy tolyqtaı avtomattandyrylǵan. Sorǵy jumysy men barlyq kórsetkishti mamandar onlaın rejımde baqylaı alady.
Degenmen kóktem-jaz mezgilderinde Lenger qalasynda aýyzsý tapshylyǵy baıqalady.
Aýdan ákimdiginiń málimetinshe, máseleni sheshý úshin Dostyq eldi mekeninen qosymsha eki uńǵyma qazý úshin jobalaý-smetalyq qujattama ázirlengen. Joba quny — 283 mln teńge.
— Sonymen qatar aýyzsýmen qamtamasyz etý júıesiniń turaqtylyǵyn arttyrý, sý qysymyn retteý jáne rezervtik sý qoryn tıimdi paıdalaný maqsatynda eki sý munarasyn jóndeý josparlanyp otyr. Bul jobaǵa 124,6 mln teńgege jobalaý-smetalyq qujattama ázirlengen. Onyń 32,6 mln teńgesi aýdan bıýdjeti esebinen qaralyp, qalǵan qarjyǵa oblystyq bıýdjetten ótinim berilgen, — delingen vedomstvo aqparatynda.
Budan bólek, Lenger qalasyna qarasty «Kókterek» ashyq sý kózinen keletin sýdyń laılanýyna jol bermeý jáne aýyzsý sapasyn jaqsartý úshin zamanaýı tazartý qondyrǵylaryn ornatý jobasy ázirlengen. Qujattama saraptamanyń oń qorytyndysyn alǵan.
— Jobanyń quny — 1,8 mlrd teńge. Nátıjesinde 31 521 adam nemese 7 392 abonent taza ári sapaly aýyzsýmen qamtamasyz etiledi dep josparlanyp otyr, — dep málimdedi ákimdik ókilderi.
Budan buryn Qyzylorda qalasyndaǵy kópqabatty turǵyn úılerdiń birinen qatty laılanǵan sý aǵyp jatqany týraly jazǵan edik.