Túrkistan oblysynda turǵyndar Batys Eýropa – Batys Qytaı jolynyń sapasyna shaǵymdandy
TÚRKІSTAN. KAZINFORM – Túrkistan oblysynda Batys Eýropa – Batys Qytaı halyqaralyq tranzıttik dáliziniń keı ýchaskelerindegi joldyń jaı-kúıi turǵyndardy alańdatyp otyr.
Kúre joldyń boıynda ornalasqan eldimeken turǵyndary jol jamylǵysynyń sapasyn synǵa aldy. Ordabasy aýdany Tórtkúl aýyl okrýginiń turǵyny Dosybaı Dónenbaıdyń sózinshe, Tórtkúl, Kókaral jáne Spataev eldimekenderi aralyǵynda joldyń keı tustarynda jaryqtar men oıyqtar paıda bolǵan.
– Batys Eýropa – Batys Qytaı dálizi Tórtkúl aýylyn basyp ótedi. Kún saıyn bul jolmen myńdaǵan kólik, sonyń ishinde aýyr júk kólikteri qatynaıdy. Tórtkúl eldimekeniniń ortalyǵynda, Tórtkúl men Kókaral arasynda jáne Spataev eldimekeni aýmaǵynda joldyń jaǵdaıy syn kótermeıdi. Búlingen jol ýchaskeleri kólik júrgizýshilerine qıyndyq týdyryp otyr, – dedi turǵyn.
Taıaýda atalǵan joldaǵy ruqsat etilgen qozǵalys jyldamdyǵy 110-nan 120 km/saǵatqa deıin ulǵaıtylǵan. Turǵyndardyń aıtýynsha, joldyń keı ýchaskelerindegi jaǵdaıǵa qaramastan, jyldamdyq rejımin buzatyn júrgizýshiler az emes.
«QazAvtoJol» UK» AQ Túrkistan oblystyq fılıalynyń málimetinshe, Túrkistan oblysyndaǵy respýblıkalyq mańyzy bar avtomobıl joldarynyń jalpy uzyndyǵy 678 shaqyrymdy quraıdy. Onyń 217,5 shaqyrymy Batys Eýropa – Batys Qytaı halyqaralyq tranzıttik dálizine qarasty aqyly joldarǵa tıesili.
Fılıal dırektorynyń orynbasary Qýatbek Nurbaevtyń aıtýynsha, aqyly joldardyń Shymkent – Qyzylorda jáne Shymkent – Tashkent baǵyttarynda aqaýlardyń paıda bolý qaýpi joǵary.
– Buǵan aptap ystyq, kólik aǵynynyń qarqyndylyǵy jáne aýyr júk kólikteriniń shamadan tys júktemesi áser etedi. Qazirgi ýaqytta joldaǵy búlingen ýchaskelerdi jaqsy jáne qanaǵattanarlyq jaǵdaıǵa keltirý úshin oblystyń barlyq baǵyttarynda kútip-ustaý jáne aǵymdaǵy jóndeý jumystary júrgizilip jatyr. Sonymen qatar Shymkent – Qyzylorda baǵytynda ortasha jóndeý jumystary qolǵa alyndy, – dedi ol.
Qazirgi ýaqytta Túrkistan oblysynda jalpy uzyndyǵy 123 shaqyrym bolatyn aqyly joldyń 6 ýchaskesi kepildik merziminde tur. Kepildik kezeńinde aqaýlar anyqtalsa, olar kelisimshart talaptaryna sáıkes merdiger uıymnyń qarajaty esebinen joıylady.
Qýatbek Nurbaevtyń aıtýynsha, ótken jyly beton joldyń ústine mıkrosıýrfeısıng tehnologııasy synaq retinde qoldanylǵan. Alaıda materıaldyń qysqa merzimde tozýyna baılanysty basqa sheshim qabyldanǵan.
– Qazirgi tańda Tórtkúl men Túrkistan arasyndaǵy jolda jumystar bastaldy. Merdiger – «Alem trans jol» kompanııasy. Bıyl ýchaskeniń 30 shaqyrymyn aıaqtaý josparlanǵan. Bul – ótpeli nysan. Munda mıkrosıýrfeısıng qoldanylmaıdy. Beton jamylǵysynyń betki qabaty alynyp, polımerli materıal tóseledi. Byltyr Tórtkúl men Spataev eldimekenderi arasyndaǵy ýchaskede osy tehnologııa qoldanyldy. Nátıjesi jaqsy boldy, – dedi Qýatbek Nurbaev.
Jol sapasyna qatysty másele taıaýda Túrkistan oblysynyń ákimi Nuralhan Kósherovtiń Ordabasy aýdany turǵyndarymen kezdesýinde de kóterildi.
– Qazaqstandaǵy aqyly joldardyń ishinde eń kóp tabys beretin joldardyń biri Túrkistan oblysy arqyly ótedi. «QazAvtoJol» basshylyǵymen kelissózder júrgizildi. Jobany ázirlep, joldy qaıta qalpyna keltirýge bıyl 9 mlrd teńgege jýyq qarjy bólinip jatyr. Jumystar bastaldy. Sapasyn baqylaýda ustaımyz, – dedi óńir basshysy.
Sonymen qatar jol jamylǵysynyń qysqa merzimde qaıta búlinýiniń aldyn alý úshin aýyr júk kólikteriniń belgilengen salmaq parametrlerin saqtaýyna baqylaý kúsheıtilmek. Osy maqsatta oblystaǵy respýblıkalyq mańyzy bar joldardyń 6 ýchaskesine avtomattandyrylǵan ólsheý qurylǵylaryn ornatý josparlanǵan.
Jol sapasymen qatar, qozǵalys qaýipsizdigi de polıtsııa nazarynda. Túrkistan oblysy polıtsııa departamentiniń málimetinshe, jyldyń alǵashqy alty aıynda halyqaralyq mańyzy bar KAZ06 avtomobıl jolyndaǵy kemshilikterdi joıý jáne qozǵalys qaýipsizdigin qamtamasyz etý boıynsha «QazAvtoJol» UK» AQ Túrkistan oblystyq fılıalyna 31 uıǵarym berilgen.
Sondaı-aq atalǵan kezeńde KAZ06 avtomobıl jolynda 32 jol-kólik oqıǵasy tirkelip, 10 adam qaza tapqan, 41 adam jaraqattanǵan.
Buǵan deıin habarlaǵanymyzdaı, byltyr aqyly joldardan 90 mlrd teńgege jýyq qarajat jınaldy.
Sondaı-aq Túrkistan oblysyndaǵy «Batys Eýropa – Batys Qytaı» halyqaralyq avtomagıstraline balama jol qurylysynyń merziminen keshigip jatqany týraly jazǵan edik.
