Túrkistan oblysynda toı ústinde dinı ýaǵyz aıtqan turǵynnyń isi sotqa joldandy
TÚRKІSTAN. KAZINFORM – Túrkistan oblysynyń 66 jastaǵy turǵynyna qatysty qylmystyq is sotqa joldandy. Onyń toıda áıelder men ánshilerdi kemsitip sóılegen vıdeosy áleýmettik jelide tarap, qoǵamnyń narazylyǵyn týdyrǵan edi.
Túrkistan oblysy Polıtsııa departamentiniń resmı saýalǵa bergen jaýabyna sáıkes, sotqa deıingi tergeý aıaqtalǵan.
– Qanaev K.-ǵa qatysty qylmystyq is sotqa deıingi tergeý bastalǵan sátten bastap aıaqtalǵanǵa deıin QR Qylmystyq kodeksiniń 174-baby 1-bóligi boıynsha tergeldi. Qylmystyq quqyq buzýshylyqtyń saralanýy ózgertilgen joq jáne qosymsha bappen tolyqtyrylmady, – dedi Túrkistan oblysy Polıtsııa departamenti tergeý basqarmasynyń bastyǵy Muhtar Seıdildaev.
Kúdiktige qatysty eki aı merzimge qamaýda ustaý túrindegi bultartpas shara qoldanylǵan. Onyń merzimi uzartylmaǵan.
Vedomstvonyń málimetinshe, qylmystyq is boıynsha keshendi sot dintaný, saıasattaný jáne psıhologııalyq-fılologııalyq saraptamasy taǵaıyndalyp, aıaqtalǵan.
– 2026 jylǵy 26 tamyzda qylmystyq is Qazaqstan Respýblıkasynyń Qylmystyq-protsestik kodeksiniń 190-babynda kózdelgen tártippen sotqa joldandy. Sotqa deıingi tergep-tekserýdiń ózge de málimetteri QR QPK-niń 201-babynyń talaptaryna sáıkes jarııa etýge jatpaıdy, – dedi Muhtar Seıdildaev.
QR Qylmystyq kodeksiniń 174-babynyń 1-bóligine sáıkes, áleýmettik, ulttyq, rýlyq, násildik nemese dinı alaýyzdyqty qozdyrýǵa baǵyttalǵan qasaqana jarııa áreketter úshin 2 myńnan 7 myńǵa deıingi AEK mólsherinde aıyppul nemese eki jyldan jeti jylǵa deıingi merzimge bas bostandyǵyn shekteý kózdelgen. Sondaı-aq osy merzimge bas bostandyǵynan aıyrý jazasy da qarastyrylǵan.
2026 jyly 1 AEK mólsheri – 4 325 teńge. Osylaısha, aıyppul kólemi 8 mln 650 myń teńgeden 30 mln 275 myń teńgege deıin bolýy múmkin. Sottalýshy kináli dep tanylǵan jaǵdaıda qandaı jaza taǵaıyndalatynyn sot sheshedi.
Eske salaıyq, tamyz aıynyń basynda Túrkistan oblysynyń Jetisaı qalasynda ótken toıdan túsirilgen vıdeo áleýmettik jelilerde taraǵan edi. Vıdeoda toı qonaǵy ánshilerdi «shaıtannyń azanshylary» dep atap, áıelder men er adamdar bólek otyrýy kerek ekenin aıtqan. Sondaı-aq áıelderdi «urǵashylar» dep ataǵan. Osydan keıin polıtsııa qylmystyq is qozǵady.
Vıtse-prezıdent Erlan Qarın Qazaqstannyń zaıyrly memleket ekenin atap ótip, dindi óner men mádenıetke qarsy qoıýǵa bolmaıtynyn aıtqan.
Onyń pikirinshe, áıelderdi kemsitý, ánshilerge, mýzyka ónerine qatysty teris pikir bildirý bolmysymyzǵa múldem jat.
Sondaı-aq Qazaqstan musylmandary dinı basqarmasy ıslam dininde ana men áıel adamǵa qurmet kórsetý talap etiletinin jáne adam qadir-qasıetin qorlaýǵa qatań tyıym salynatynyn eske saldy.
