Túrkistan oblysynda tórt jasar «geograf-qyz» 195 eldiń týyn jatqa biledi
TÚRKІSTAN. KAZINFORM – Zerektigimen erekshelengen búldirshin Túrkistan oblysy Saryaǵash aýdany Bostandyq aýylynda turady.
Tórt jasar Afshona Abdıkarımova erekshe este saqtaý qabiletimen kópshilikti tańǵaldyryp júr. Kishkentaı búldirshin álemdegi 195 memlekettiń týyn jańylmaı jatqa biledi.
Afshonanyń bul qyzyǵýshylyǵy úsh jasynda bastalǵan. Ákesiniń aıtýynsha, ol nebári bir aı ishinde dúnıejúzi elderiniń týlaryn jattap alǵan. Qazirgi tańda 200-ge jýyq týdyń sýretin jınap, árqaısysyn ońaı tanyp, atyn ataıdy. Sonymen qatar 50-den astam eldiń astanasyn bir apta ishinde jadyna toqyp úlgergen.
– Úıge dúnıejúzi kartasyn ilip qoıǵan edim. Úlken uldarym soǵan úńilgen saıyn qyzym da birge qyzyǵa bastady. Týlardyń ishinen Qazaqstannyń kók baıraǵyn erekshe jaqsy kóredi. Bul onyń elge degen súıispenshiligin arttyra túsedi, - deıdi ákesi Faez Abdıkarımov.
Qazirgi tańda Afshona shahmat oınaýdy úırenip júr. Eki aǵasymen jattyǵady. Bolashaqta ol ózi týyn jatqa biletin elderge saıahattap, týrızm salasynda Qazaqstannyń abyroıyn asqaqtatýdy armandaıdy.
Zerek qyzdyń ákesi Faez Abdıkarımov – №9 Maılyqoja atyndaǵy jalpy bilim beretin mekteptiń aǵylshyn tili páni muǵalimi. Ol bilim berý salasynda 12 jyldan beri eńbek etip keledi. Birneshe tildi jetik meńgergen ustaz qazaq, tájik, ózbek, aǵylshyn, orys jáne parsy tilderinde erkin sóıleıdi. Sonymen qatar óleń jazýmen de aınalysady.
– Balanyń basty ustazy – ata-ana. Barlyq tárbıe otbasynan bastalady. Balalaryma memlekettik tildi úıretip, elin súıetin azamat bolyp ósýine mán berip kelemin. Otanymyzdy birge súıip, birge kórkeıteıik, - dedi ol.
Budan buryn tisimen sýret salatyn túrkistandyq qyz eldi tańǵaldyrǵanyn jazǵan edik.
