Túrkistan oblysynda tazalyq talaptaryn buzǵandarǵa 166 mln teńgeden astam aıyppul salyndy
TÚRKІSTAN. KAZINFORM — Túrkistan oblysynda «Taza Qazaqstan» jalpyulttyq baǵdarlamasynyń iske asyrylý nátıjeleri jarııa etildi.
Oblysta qoǵamdyq oryndardyń tazalyǵy men qoǵamdyq tártiptiń saqtalýyna baqylaý kúsheıtildi. Sonyń nátıjesinde jyl basynan beri Ákimshilik quqyq buzýshylyq týraly kodekstiń 434-2-baby boıynsha 4719 ákimshilik hattama toltyrylyp, 135,4 mln teńge aıyppul salyndy. Onyń 87,9 mln teńgesi óndirildi. Sondaı-aq Kodekstiń 505-baby boıynsha 4 941 hattama rásimdelip, 31,5 mln teńge aıyppul salyndy. Onyń 22 mln teńgesi óndirilgen.
Oblys ákimdiginiń málimetinshe, baǵdarlama aıasynda iske qosylǵan «Taza Qazaqstan» Telegram chat-boty arqyly turǵyndardan 1 323 ótinish túsken.
— Aýyldyq okrýg ákimdikteri tarapynan da qoǵamdyq tártipti saqtaý boıynsha jumystar jalǵasyp jatyr. Jyl basynan beri 2 794 ákimshilik hattama toltyrylyp, olardyń 2 465-i eskertý túrinde rásimdeldi. «Ǵarysh Sapary» anyqtaǵan 250 qoqys ornynyń búgingi kúnge deıin 33-i tolyq tazartylmaǵan. Osyǵan baılanysty jaýapty ákimdikterge atalǵan kemshilikterdi tolyq joıý mindeti júkteldi, — delingen habarlamada.
Al maýsym men shilde aılarynda júrgizilgen monıtorıng barysynda oblys aýmaǵynda 399 kemshilik anyqtalǵan. Onyń 349-y beı-bereket qoqys oryndaryna, 50-i saıabaqtar, skverler men alleıalardyń kútimine qatysty boldy. Jaýapty mekemelerge berilgen tapsyrmalar nátıjesinde anyqtalǵan barlyq kemshilik tolyqtaı joıylǵan.
Buǵan deıin Túrkistan oblysynda 247 zańsyz qoqys orny anyqtalǵanyn habarlaǵan edik.
