Túrkistan oblysynda «Taza Qazaqstan» qosymshasy pılottyq rejımde iske asyrylýda
TÚRKІSTAN. KAZINFORM – «Taza Qazaqstan» baǵdarlamasy oblys kóleminde ýaqytyly ótkizilýde. Qazirgi tańda jalpy aýdan, qalalarda 291 aýqymdy is-sharasy ótkizildi.
Jyl sońyna deıin bekitilgen kestege sáıkes, 807 tazalyq sharasyn ótkizý josparlanǵan. Bul týraly búgin oblys ákimi Darhan Satybaldynyń tóraǵalyǵymen ótken jıynda aıtyldy.
Oblys ákiminiń birinshi orynbasary Zulpyhar Joldasov atqarylǵan jumystar týraly baıandady. Jalpy barlyq aýdan, qalalarǵa kireberis aýmaqtary men joldardyń boıy tazalanyp, retke keltirilgen. Ótken aptanyń ishinde, 10 aýdannyń 33 eldi mekeninde aýqymdy senbilik ótkizilgen. Nátıjesinde 3 236 turǵyn qatysyp, 554 qoǵamdyq jumysshy tartylǵan. Sonymen qatar 59 tehnıka jumyldyrylyp, 66,8 tonna qoqys shyǵaryldy.
Túrkistan óńirinde «Taza Qazaqstan» qosymshasy pılottyq rejımde sátti iske asyrylýda. Búginde 320 ótinim túsip, onyń 297-si oryndalǵan. Qalǵany oryndalý barysynda, al onnan asa ótinim maǵynasyz bolǵandyqtan qaıtarylǵan. Buǵan qosa qosymshany keńinen nasıhattaý jumystary júrgizilýine baılanysty, platformada ótinimderdiń sany kóbeıýde. Bir aptanyń ishinde 33,3% ósip otyr.
Óńir basshysy atalǵan aqparattyq júıemen jumystardy júrgizý Prezıdent Ákimshiliginiń tikeleı baqylaýynda ekenin atap ótti. Aýdan, qala ákimdikteri bul baǵyttaǵy jumystardy kúsheıtý qajet dedi. Apta saıynǵy keńesterde, óńirlerdegi qosymshamen jumys deńgeıi boıynsha baıandaýdy tapsyrdy.
Aıta keteıik, jalpy «Taza Qazaqstan» baǵdarlamasynyń ótýi turaqty qadaǵalanýda. Oblys kólemindegi respýblıkalyq jáne oblystyq mańyzy bar joldardyń boıyndaǵy kópqabatty turǵyn úılerdiń birinshi kezekte qasbetterin syrlaý, árleý, birkelki túske boıaý jáne túrli-tústi gamma jaryqshamdaryn qoldaný boıynsha jumystar júrgizilýde.
