Túrkistan oblysynda taýeshkiniń laǵyn taıaqpen uryp jatqan vıdeo tarady
TÚRKІSTAN. KAZINFORM — Túrkistan oblysynda turǵyndardyń taýda jabaıy ańdardyń tirshiligine kedergi keltirip, qaýip tóndirgen beınejazbasy kópshiliktiń alańdaýshylyǵyn týdyrdy.
Áleýmettik jelide jarııalanǵan beınejazbada eki adamnyń taý bókterinde jabaıy janýardy úrkitip, taıaqpen urǵan sáti kórinedi.
Oqıǵanyń Sozaq aýdanyna qarasty Qozmoldaq eldimekeni aýmaǵynda bolǵany anyqtaldy. Osyǵan baılanysty aýdan ákimdigi túsinikteme berdi.
— Beınejazbada kórsetilgen málimetke sáıkes, Qozmoldaq eldimekeniniń jasóspirimderi taý bókterinde júrgen kezde taýeshkiniń laǵyna kezikken. Qyzyǵýshylyq tanytqan jasóspirimder janýardy ustap kórýge áreket jasaǵan. Atalǵan jaǵdaı barysynda taý janýaryna eshqandaı zııan kelmegen, — delingen habarlamada.
Vedomstvo málimetinshe, qazirgi ýaqytta jasóspirimdermen jáne olardyń ata-analarymen túsindirý jumystary júrgizildi.
— Túsindirý barysynda tabıǵat aıasynda jabaıy janýarlarǵa jaqyndamaý, olardyń tabıǵı tirshiligine kedergi keltirmeý jáne qorshaǵan orta men janýarlar dúnıesine uqypty qaraý qajettigi aıtyldy, — dep málimdedi aýdan ákimdiginiń baspasóz qyzmeti.
Buǵan deıin janýarlarǵa qatygezdik kórsetkender 400 myń teńgege jýyq aıyppul tóleıtini týraly habarlaǵan edik.
