Túrkistan oblysynda taýda qalyp qoıǵan eki jasóspirim qutqaryldy

TÚRKІSTAN. KAZINFORM — Saıram-Ógem memlekettik ulttyq tabıǵı parkiniń aýmaǵynda qutqarý operatsııasy sátti júrgizildi.

13 jastaǵy eki jasóspirim taýly aımaqpen serýendep júrip, adasyp ketken. Olar tik jartasty betkeıde qalyp qoıǵandyqtan óz betinshe tómen túse almaǵan. Jasóspirimderdiń birimen baılanys turaqsyz bolǵanyna qaramastan, qutqarýshylar onyń turǵan jerin naqty anyqtaǵan.

Atalǵan oqıǵa boıynsha Tótenshe jaǵdaılar mınıstrliginiń Respýblıkalyq jedel-qutqarý jasaǵynyń qyzmetkerleri kınologpen jáne zamanaýı tehnıkalyq quraldarmen, sonyń ishinde ushqyshsyz ushý apparatynyń kómegimen izdestirý-qutqarý jumystaryna kiristi. Qutqarýshylar GPS koordınattary arqyly balalardyń ornalasqan jerin anyqtap, baǵyt-baǵdar berip, olardy qaýipsiz jerge deıin alyp tústi.

— Oqıǵa saldarynan zardap shekkenderge medıtsınalyq kómek qajet bolǵan joq. Qutqarý operatsııasy kásibı ári úılesimdi uıymdastyrylyp, balalar ata-analaryna din aman tabystaldy, — delingen Túrkistan oblysy Tótenshe jaǵdaılar departamentiniń baspasóz qyzmeti taratqan aqparatta. 

Aıta keteıik, budan buryn Túrkistan oblysynda 400 mln tekshe metrge jýyq sý zańsyz paıdalanylǵanyn jazǵan bolatynbyz.