Túrkistan oblysynda 37 myńnan astam jas alǵash ret daýys beredi
TÚRKІSTAN. KAZINFORM – Túrkistan oblysynda respýblıkalyq referendým joǵary belsendilikpen ótip jatyr.
Bul jolǵy saıası naýqannyń basty ereksheligi — óńirdegi jastardyń saıası protsesterge degen erekshe qyzyǵýshylyǵy men belsendiligi.
Búgin tańǵy saǵat 07:00–den bastap oblys kóleminde 947 daýys berý ýchaskesi óz jumysyna kiristi. Onyń ishinde 26 ýchaske jabyq formatta qyzmet kórsetip jatyr.
Óńirdegi saılaýshylar tizimindegi 1 187 257 azamattyń (oblys halqynyń 55,4%-y) arasynda jastardyń úlesi kóp.
Atap aıtqanda, bıyl 37 796 jas azamat alǵash ret referendýmda daýys berý múmkindigine ıe boldy.
— Bul jastar úshin tek daýys berý ǵana emes, el bolashaǵyna jaýapkershilikpen qaraýdyń alǵashqy úlken qadamy. Olardyń belsendiligi óńirdegi saıası mádenıettiń ósip kele jatqanyn kórsetedi, — deıdi 133 ýchaskelik referendým komıssııasynyń tóraǵasy Bashbenova Gúlnar.
Eske sala keteıik, referendým ýchaskeleri keshki saǵat 20:00–ge deıin jumys isteıdi. Árbir alǵash daýys berýshige ýchaskelerde estelik syılyqtar tapsyrý dástúri de jalǵasyp jatyr.
