Túrkistan oblysynda talaptardy buzǵan 14 adam túzeý mekemesine qaıta jiberildi
TÚRKІSTAN. KAZINFORM – Túrkistan oblysynda profılaktıkalyq esepte turǵan azamattar tekserildi.
Qazirgi ýaqytta óńirde shartty túrde merziminen buryn bosatylǵan 242 adam jáne ákimshilik qadaǵalaýdaǵy 157 azamat bar.
Oblystyq polıtsııa departamentiniń málimetinshe, shartty túrde merziminen buryn bosatylǵan, ákimshilik qadaǵalaýdaǵy jáne sot sheshimimen úıqamaqqa alynǵan azamattardyń júrip-turýyn baqylaý úshin olarǵa elektrondyq bilezikter taǵylǵan. Bul qurylǵylar belgilengen shekteýlerdiń saqtalýyn qadaǵalaýǵa múmkindik beredi.
Quqyq buzýshylyqtardyń aldyn alý jáne qaıtalama qylmystarǵa jol bermeý maqsatynda polıtsııa qyzmetkerleri profılaktıkalyq esepte turǵan azamattardy turǵylyqty mekenjaılary boıynsha tekserdi.
– Tekserý barysynda belgilengen talaptardy buzǵan shartty túrde merziminen buryn bosatylǵan 14 adam túzeý mekemelerine qaıta jiberildi, – delingen polıtsııa habarlamasynda.
Polıtsııa departamenti profılaktıkalyq esepte turǵan azamattardy baqylaý jáne quqyq buzýshylyqtardyń aldyn alý baǵytyndaǵy jumystar turaqty túrde júrgizilip jatqanyn atap ótti.
Buǵan deıin Qostanaı oblysynda túrmelerdegi uıaly baılanys sıgnaly úshin úsh operator jazalanǵanyn habarlaǵan edik.
