Túrkistan oblysynda talan-tarajǵa túsken bıýdjet qarajatynyń 1 mrld teńgeden astamy qaıtaryldy

TÚRKІSTAN. KAZINFORM –  Atalǵan is boıynsha jalpy 80 adam kúdikti dep tanylǵan. Bul týraly Túrkistan oblysy boıynsha Ekonomıkalyq tergep-tekserý departamentiniń basshysy Erbolat Balǵabaev málimdedi.

Eldi eleń etkizgen bilim salasyndaǵy memleket qarajatyn talan-tarajǵa salý derekteri boıynsha ekonomıkalyq tergep-tekserý departamenti tergeý jumystaryn júrgizip jatyr. Keles, Maqtaaral, Báıdibek, Sozaq aýdandyq bilim bóliminiń qyzmetkerlerine qatysty QR QK-niń 189 baby 4 bóligi 2 tarmaǵyndaǵy qylmystyq quqyqbuzýshylyqtar men birqatar qylmystyq ister boıynsha jalpy 80 adam kúdikti dep tanylǵan. Olardyń bir bóligi qamaýǵa alyndy.

«Atalǵan is boıynsha bıýdjetke keltirilgen zalaldyń kólemi 3 mlrd teńge. Búgingi tańǵa qoldanylǵan sharalardyń nátıjesimen 1 mrld teńgeden astam qarajat qolma-qol oblys bıýdjetine qaıtaryldy. Іs boıynsha júrgizilgen qatarlas qarjylyq tergeý nátıjesimen kúdiktilermen úshinshi tulǵalardyń atyna rásimdelgen 1,8 mlrd teńgeniń (qymbat kólikteri, kottedjder, ǵımarattar, jer telimderi jáne de basqadaı) múlikterine sot sanktsııasymen tyıym salyndy», - dedi Erbolat Balǵabaev.

Aıta keteıik, buǵan deıin Túrkistan oblysynda bilim salasynyń qyzmetkerleri 2,6 mlrd teńge jymqyrdy degen kúdikke ilingeni jaıynda jazǵan bolatynbyz.