Túrkistan oblysynda taǵy bir bala sýǵa aǵyp ketti
TÚRKІSTAN. KAZINFORM — Túrkistan oblysy Saıram aýdany Mashat aýylyndaǵy Mashat ózeninde sýǵa ketken 2024 jyly týǵan búldirshindi izdestirý jumystary jalǵasyp jatyr.
Aldyn ala málimet boıynsha, 31 naýryz kúni saǵat 18:00 shamasynda 2 jasar bala oınap júrip, sýǵa qulap, batyp ketken.
— Іzdestirý-qutqarý jumystaryna Túrkistan oblysy men Shymkent qalasynyń TJD Jedel-qutqarý jasaqtary, Polıtsııa departamenti, prokýratýra, jedel medıtsınalyq járdem qyzmeti, jergilikti atqarýshy organdar, sondaı-aq týystary men jergilikti turǵyndar jumyldyryldy, — dep habarlady oblystyq Tótenshe jaǵdaılar departamenti.
Jalpy izdestirý jumystaryna 250 jýyq adam, 14 tehnıka, 2 júzý quraly, TJM 1 kınologııalyq esebi men ushqyshsyz ushý apparaty jáne 1 spýtnıktik baılanys quraly tartylǵan.
— Qazirgi ýaqytta sý túbi 1 km, jaǵalaý syzyǵy 5 km (jaıaý) tekserildi. Sondaı-aq dron arqyly 1 km aýmaq baqylandy. Іzdestirý-qutqarý jumystary jalǵasyp jatyr, — dep málimdedi vedomstvo.
Budan buryn habarlaǵanymyzdaı, 23 naýryz kúni Túrkistan oblysy Keles aýdanynda 8 jasar bala ózenge batyp ketken edi. Búldirshin áli tabylǵan joq.