Túrkistan oblysynda taǵy bir aýyl ishimdikten bas tartty

TÚRKІSTAN. KAZINFORM – Óńirde araq satpaıtyn eldimekenderdiń qatary artyp keledi.

Saryaǵash aýdanyna qarasty Mádenıet aýylynda 1500-ge jýyq halyq turady.

Ýchaskelik polıtsııa ınspektory Murat Tólegenovtyń aıtýynsha, eki jyl ishinde eldimekende birde-bir qylmys tirkelmegen.

- Quqyq buzýshylyqtyń aldyn alý boıynsha túsindirý jumystaryn úzdiksiz júrgizip otyramyz. Halyqta bizdi qoldap otyr. Árdaıym kómek berip otyrady, - deıdi Murat Tólegenov.

Jaqynda eldimeken «Іshimdiksiz aýyl» jobasyna engen. Bul bastamaǵa jergilikti turǵyndar, aqsaqaldar men belsendiler biraýyzdan qoldaý bildirgen. Sondaı-aq, aýyldaǵy dúken ıeleri de birden ishimdik satpaıtyn bolǵan.

- Іshimdik bizdiń balalarymyzǵa da, bolashaǵymyzǵa da úlken zııan. Sondyqtan ishimdik satpaımyz, - deıdi dúken ıesi Mastýra Smanova.

Aýyl turǵyndarymen kezdesken Túrkistan oblysy polıtsııa departamentiniń jergilikti polıtsııa qyzmeti basqarmasynyń bastyǵy Ermek Óserbaev alkogolden bas tartý dástúrli qundylyqtardy nyǵaıtýǵa jáne salaýatty ómir saltyn qalyptastyrýǵa yqpal etetinin jetkizdi.

- «Birlik qaıda barasyń – yntymaqqa» degen qazaqta qanatty sóz bar. Yntymaqtaryńyz arta bersin. Birligi bekem el bolaıyq. Bul árıne otbasylyq qundylyqtardy nyǵaıtady, ómir sapasyn jaqsartady jáne polıtsııanyń jumysyna degen senimin arttyrady, -dedi ol.

Aıta keteıik, budan buryn depýtat Ardaq Nazarov Túrkistandy araqsyz qalaǵa aınaldyrsaq degen usynysyn jetkizgen bolatyn.