Túrkistan oblysynda suńqar tektes qustardyń sany azaıyp ketken
TÚRKІSTAN. KAZINFORM – Erekshe qorǵaýǵa alynǵan qustardy zańsyz aýlaýshylar jaýapqa tartylyp, 700 AEK mólsherinde aıyppul tóleıdi. Bul týraly «Ohotzooprom ÓB» Qyzylorda óńirlik fılıaly basshysynyń orynbasary Nýrıddın Qasymov málimdedi.
1 tamyz-31 qazan aralyǵynda elimizdiń 12 aımaǵynda «Suńqar» keń kólemdi tabıǵatty qorǵaý aktsııasy ótedi. Basty maqsat - «Qyzyl kitapqa» engen suńqar tektes qustardy uıymdasqan qylmystyq toptardyń zańsyz aýlaý qyzmetin anyqtaý jáne olardy qorǵaý.
«Suńqar» keń aýqymdy aktsııasy - Shyǵys Qazaqstan, Abaı, Jetisý, Aqtóbe, Mańǵystaý, Qyzylorda, Túrkistan, Qaraǵandy, Ulytaý, Pavlodar, Jambyl, Almaty oblystarynyń jáne kórshiles oblystardyń irgeles aýdandarynyń aýmaqtarynda ótedi. Atalǵan óńirlerde suńqar tektes qustardyń meken etetin aýmaqtaryn qorǵaý jumystary uıymdastyrylady. Oǵan mekemeniń 163 ınspektory, 80-ge jýyq arnaıy kólik, «dron» apparattary, túngi kórý qurylǵylary qoldanylady. Aıta keterligi, qazirgi tańda mekeme tarapynan qyzyl kitapqa engen ań-qustardy zańsyz aýlaýmen aınalysatyndarǵa qarsy arnaıy jedel top quryldy», - dedi Nýrıddın Qasymov.
Al, Túrkistan oblysynyń orman sharýashylyǵy jáne janýarlar dúnıesi aımaqtyq ınspektsııasynyń bas mamany Zaıyr Ústenovtyń aıtýynsha, oblys aýmaǵynda ornalasqan Aqsý-Jabaǵyly jáne Qarataý qoryqtarynda suńqar tektes qustar ómir súredi. Degenmen, sońǵy jyldary atalǵan qustardyń sany kúrt azaıyp ketken. Qazirgi tańda qoryqtarda 100-150 jup qana suńqar tektes qus bar. Sala mamandary erekshe qorǵaýǵa alynǵan qustardy zańsyz aýlaýshylar jaýapkershilikke tartylyp, 700 AEK mólsherinde aıyppul tóleıtindigin eskertti.
Osyǵan deıin Túrkistan oblysynda janýarlardy jaıý qaǵıdasyn buzǵan 3 myńnan astam turǵyn jaýapqa taratylǵanyn jazdyq.
