Túrkistan oblysynda Sultan, Omar, Osman esimdi úshem dúnıege keldi
TÚRKІSTAN. KAZINFORM — Túrkistan oblysynda úshem ómirge keldi. Sábılerdiń jaǵdaıy turaqtalyp, úıine shyǵaryldy.
№ 1 oblystyq perınataldyq ortalyqtyń dárigerleri men neonatologtary shala týǵan nárestelerge qarqyndy terapııa jáne arnaıy kútim kórsetti. Nátıjesinde úsh sábıdiń de jaǵdaıy turaqtalyp, salmaq qosý kórsetkishteri jaqsarǵan.
Oblystyq densaýlyq saqtaý basqarmasynyń málimetinshe, Dınara Mametova 33 aptalyq júktilik kezinde úshem bosanǵan.
Nárestelerdiń biri — Oshaqbaı Sultan Ǵabıtuly 2026 jylǵy 9 qyrkúıekte 2145 gramm salmaqpen dúnıege kelgen. Sábıge «shala týý, respıratorlyq dıstress-sındrom» dıagnozy qoıylǵan. Ol ortalyqta 13 táýlik em alyp, 21 qyrkúıekte 2155 gramm salmaqpen qanaǵattanarlyq jaǵdaıda úıine shyǵaryldy.
Ekinshi sábı — Oshaqbaı Omar Ǵabıtuly 2240 gramm salmaqpen dúnıege kelip, emdeý uıymynan 2260 gramm salmaqpen shyqqan. Úshinshi sábı — Oshaqbaı Osman Ǵabıtulynyń týǵan kezdegi salmaǵy 2030 gramm bolsa, shyǵarylǵan kezde 2050 grammǵa jetken.
Perınataldyq ortalyqtyń basshysy Saltanat Ýsadýllaevanyń aıtýynsha, shala týǵan úshemderdiń jaǵdaıyn turaqtandyrý medıtsına mamandary úshin úlken jaýapkershilikti talap etken.
— Úshemderdiń dúnıege kelýi — bizdiń ortalyq úshin úlken jaýapkershilik ári qýanysh. Ásirese 33 aptalyq merzimde jáne respıratorlyq dıstress-sındrom dıagnozymen týǵan sábılerdi aman-esen alyp shyǵý — neonatologtar men reanımatsııa bólimi mamandarynyń joǵary biliktiliginiń dáleli. Sábılerdiń salmaq qosý dınamıkasy jaqsy. Oshaqbaı áýletin jańa múshelerimen quttyqtaımyz, — dedi ortalyq basshysy.
Dárigerlerdiń aıtýynsha, sábılerdiń aldaǵy fızıologııalyq damýy turǵylyqty jeri boıynsha alǵashqy medıtsınalyq-sanıtarlyq kómek uıymy men ýchaskelik pedıatrlardyń baqylaýynda bolady.
Buǵan deıin Almatyda jyl basynan beri 6 úshem dúnıege kelgenin habarlaǵan edik.
