Túrkistan oblysynda sýǵa ketken 8 jasar balany izdeý jumystary toqtatyldy
TÚRKІSTAN. KAZINFORM – Keles ózenine aǵyp ketken balany izdestirý-qutqarý jumystary resmı túrde aıaqtaldy.
Anasynyń habarlaýynsha, 23 naýryz kúni jazataıym oqıǵa saldarynan 2018 jyly týǵan búldirshin Jannur Tursynbek Keles ózenine aǵyp ketken edi.
Oblystyq tótenshe jaǵdaılar departamentiniń málimetinshe, oqıǵa týraly habar túsken sátten bastap qutqarý bólimsheleri, polıtsııa qyzmetkerleri, jergilikti atqarýshy organdar men eriktiler jumyldyrylyp, aýqymdy izdestirý-qutqarý jumystary uıymdastyrylǵan.
Іzdestirý barysynda ózen arnasy men jaǵalaý aýmaqtary birneshe ret tekserilip, júzý quraldary, arnaıy tehnıka jáne ushqyshsyz ushý apparattary qoldanyldy. Jumystar táýlik boıy júrgizilip, sý aǵysynyń erekshelikteri men aýa raıy jaǵdaılary eskerildi. Kelip túsken árbir aqparat muqııat tekserilip, boljamdy ýchaskeler qaıta qaraldy.
– Ókinishke qaraı júrgizilgen keshendi izdestirý sharalaryna jáne barlyq kúsh pen quraldardyń jumyldyrylýyna qaramastan, oń nátıje bolmady. Mamandardyń qorytyndysy men qaýipsizdik talaptaryn eskere otyryp, izdestirý-qutqarý jumystary 2026 jylǵy 23 sáýirde resmı túrde aıaqtaldy, - delingen vedomstvonyń resmı habarlamasynda.
Qoldanystaǵy tártipke sáıkes, eger izdestirý-qutqarý jumystary bir aı ishinde nátıje bermese, sýdaǵy jazataıym oqıǵa qylmystyq is retinde qaıta saralanyp, ári qaraı protsessýaldyq sheshim qabyldaý úshin quqyq qorǵaý organdaryna beriledi.
Departament ókilderi atalǵan sheshimniń barlyq izdestirý sharalary tolyq júrgizilgennen keıin qabyldanǵanyn atap ótti. Sonymen qatar azamattardy sý aıdyndaryndaǵy qaýipsizdik erejelerin qatań saqtaýǵa jáne balalardy qaraýsyz qaldyrmaýǵa shaqyrdy.
Budan buryn habarlaǵanymyzdaı, bıyl naýryz-sáýir aılarynda Túrkistan oblysynda balalardyń qaraýsyz qalýynan 8 sýdaǵy jazataıym oqıǵa tirkeldi.
