Túrkistan oblysynda sý tasý qaýpiniń aldyn alý jumystary júrgizilýde

TÚRKІSTAN. KAZINFORM - «Qazgıdromettiń» boljaýynsha aqpan aıynda óńirde jaýyn-shashyn mólsheri normadan joǵary bolady.

Túrkistan oblysynda tasqynǵa qarsy qazirgi tańda 125 myń dana qap, 8 myń tonna janar-jaǵarmaı, azyq-túlik qory men 300-ge jýyq ınjenerlik tehnıka ázirlengen. Sonymen qatar, tótenshe jaǵdaılar departamentiniń 175 jeke quramy, «Turan sý» mekemesiniń 40 birlik ınjenerlik tehnıkasy daıyndyqqa keltirilgen.

«Buǵan deıin kúrdeli jaǵdaıda turǵan Qapshaǵaı, Yrmaq ózeni, Maıdantal sýqoımalary kúrdeli jáne aǵymdaǵy jóndeýden ótti. Syrdarııa ózeniniń jaǵdaıy turaqty. Al Shardara sýqoımasy men Kóksaraı sý rettegishinde tasqyn sýdy qabyldaýǵa shamamen 2,8 mlrd. tekshe metr bos qor bar. Qazirgi jınalyp jatqan sý kólemin esepke alsaq, tasqyn kezeńinen qaýipsiz ótemiz degen boljam bar» - dedi TJD Tótenshe jaǵdaılardy joıý basqarmasynyń bastyǵy Nurlybek Rahymberdıev.

Sonymen qatar, spıker ózender men sý qoımalaryna kúndelikti monıtorıng jumystary júrgizilip jatqandyǵyn jetkizdi.

«Búgingi tańda sýqoımalardyń tolýy 34 paıyzǵa jetip, ózenderde sý kólemi orta deńgeıden tómen aǵýda. Qazir taýǵa jınalǵan qardyń qory az jáne jer qyrtysynda toń joq. Degenmen, «Qazgıdromettiń» aqpan-naýryz aılaryna jasalǵan boljamynda aqpan aıynda oblystyń barlyq aımaǵynda túsetin jaýyn-shashyn kólemi normadan joǵary bolatyndyǵy kórsetilgen. Osyǵan baılanysty taýly aımaqtaǵy jáne Arys, Badam, Boraldaı, Keles ózeni boıyndaǵy aýdandardaǵy qaýipti aımaqtardy qaıta zerdelep, qaýiptiń aldyn alý jumystary bastalyp ketti», - dedi basqarma basshysy.