Túrkistan oblysynda sý tasqynyna qarsy daıyndyq kúsheıtildi
Túrkistan oblysynda sý tasqynyna qarsy daıyndyq jumystary kúsheıtildi. Bul másele búgin oblys ákiminiń tóraǵalyǵymen ótken apparattyq májiliste talqylandy, dep habarlaıdy Kazinform.
Túrkistan oblysy boıynsha Tótenshe jaǵdaılar departamentiniń bastyǵy Asqar Tóleshovtiń aıtýynsha, ótken jyly tasqyn sý basqan Saýran aýdanyndaǵy 5 eldi mekende 4,6 shaqyrym qashyrtqy qazylyp, 2 jerge qubyrlar ornatylǵan. Báıdibek aýdanynda 3 shaqyrym qashyrtqy arna qazylyp, Shaqpaq eldi mekeninde tasqyn sýdy buratyn 3 dana tospa qoıyldy.
Kentaý qalasyna qarasty Qarnaq eldi mekeninde 1 shaqyrym aryq, 1,3 shaqyrym Yrmaq ózeni, 800 metr ishki kanaldardyń arnasy qoqystan tazartyldy. Ordabasy aýdanynda 21,8 shaqyrym qashyrtqy arnalar tazartylyp, 11,1 shaqyrym kanalardar mehanıkalyq tazartýdan ótkizilip otyr. Sonymen qatar Túrkistan, Arys qalasy men Saıram, Ordabasy, Maqtaral, Saýran, Tólebı, Saryaǵash aýdandarynda da sý tasqynyna qarsy is-sharalar qarqyndy júrip jatyr.
«Qazgıdromettiń» málimetine sáıkes qarasha aıynda oblystyń soltústik jáne ońtústik aýmaǵynda jaýyn-shashynnyń túsýi normadan joǵary bolýy múmkin. Sondyqtan josparlanǵan is-sharalar qaıta pysyqtalyp, tyńǵylyqty daıyndyq jumystary júrgizilmek. Oblys ákimi Darhan Satybaldy sý tasqynyna qarsy is-sharalardy kúsheıte túsýdi, tapsyrmalardy ýaqtyly oryndaýdy tapsyrdy.
«Byltyr uıymdastyrylǵan jedel áreketter nátıjesinde kóptegen eldi mekende sý basý qaýpiniń aldyn ala bildik. Biraq keıbir aýdandarda kemshilikter baıqaldy. Bıyl olqylyqqa múldem jol berilmeı, jaǵdaı byltyrǵydan jaqsy bolýy tıis. Sý basý qaýpi bar aryqtar men kanaldar túgel tazartylyp, aýyldarda qaýipsizdik sharalary kúsheıtilsin. Sý tasqynynyń aldyn alý boıynsha 24 is-shara túgel oryndalýy kerek. Aýdan, qala ákimderine úsh apta ýaqyt beremin. Máseleni túbegeıli sheship, qaýipsizdikti nyǵaıtyńyzdar. Ákimdikter, Tótenshe jaǵdaı departamenti, «Turan sý» mekemesi jumysty birlese atqarǵany jón», – dedi Darhan Satybaldy.
